Kimlarga litsenziya berish rad etilmaydi?

Bugungi kunda talabgor tomonidan hujjatlar lozim darajada rasmiylashtirilmagan yoki noto‘g‘ri ma'lumotlar ko‘rsatilgan bo‘lsa yoxud ular litsenziya talablari va shartlariga, shuningdek tanlov yoki tender shartlariga muvofiq kelmaganda, litsenziya berish rad etilishi mumkin. Bular aynan qanday hujjatlar, ma'lumotlar ekanligi va ular qanday rasmiylashtirilishi, shuningdek talabgorlar qanday mezonlarga mos kelishi lozimligi Hukumat tomonidan har bir litsenziyalanadigan faoliyat turi bo‘yicha alohida ko‘rsatilgan (Lisenziyalash tartibi to‘g‘risidagi nizom).

Norma’ning yozishicha, 2020 yil 1 iyundan boshlab litsenziyalar va ruxsat etish xususiyatiga ega boshqa hujjatlarni berish tartibiga biroz o‘zgartirishlar kiritiladi. Tadbirkorlik sub'yektlariga ushbu hujjatlarni berish quyidagi talablarga javob bermasligi sababli rad etilishiga yo‘l qo‘yilmaydi:

kadrlarning professional malakasi, taqdim etilgan hujjatlar va dasturlarning qonun hujjatlarida belgilangan talablarga;

bino va inshootlarning - sanitariya-epidemiologik talablarga va yong‘in xavfsizligi talablariga.
 
Mazkur holatda vakolatli davlat organlari tadbirkorlik sub'yektlariga malakali kadrlarni izlash, hujjatlar va dasturlarni qayta ishlash uchun mutaxassislarni jalb qilish hamda boshqa zarur shart-sharoitlarni yaratishda yordam berishlari lozim. Bunda talabgorning o‘zi rozilik bildirishi lozim, u taklif etilgan yordamni rad qilishga ham haqlidir.
 
Adliya vazirligi uch oy muddatda belgilangan tartibni joriy etish bo‘yicha takliflarni kiritishi lozim.
 
Eslatib o‘tish joizki, 2020 yilda litsenziyalar va ruxsat etish xususiyatiga ega boshqa hujjatlar sonini kamida ikki marta qisqartirish rejalashtirilgan. Bu haqda Prezident tomonidan 24 yanvardagi Oliy Majlisga murojaatnomada, 17 fevraldagi yig‘ilishda aytib o‘tilgan hamda bu 2020 yilga tasdiqlangan Davlat dasturida belgilangan (iqtisodiyotni rivojlantirish va investitsiyalarni faol jalb etish doirasida). Birinchi navbatda, inson hayoti va salomatligiga xavf tug‘dirmaydigan bandlar chiqarib tashlanadi hamda ushbu sohalarda litsenziyalash o‘rniga boshqa nazorat mexanizmlari joriy etiladi.