Oldin olingan stikerlar bekor qilinadimi?

Men advokatman. Davlat xizmatlari markaziga stiker olish uchun murojaat kilgan edim, menga rad javobini berishdi. Bu holatda men kimga murojaat etsam buladi?

Respublika maxsus komissiyasining tegishli qarorida, qaysi soha vakillari va qaysi transport vositalariga stiker berilishi aniq belgilangan edi. Shuningdek, ro‘yxatda qaysidir holat nazarda tutilmagan bo‘lsa Adliya vazirligi tomonidan komissiya ko‘rsatmasi asosida ruxsatnoma berilishi ko‘rsatilgan edi.

Ta'kidlash joizki, sud-tergov organlari tomonidan advokatlarning o‘zlarining avtotransport vositalariga hamrohlik qilgan holda sud-tergov tadbirlarida ishtiroki ta'minlab berilmoqda, shuningdek Advokatlar palatasi va ularning hududiy bo‘linmalari rahbarlariga avtotransport vositalarini boshqarish uchun alohida so‘rovga asosan tegishli ruxsatnomalar (stikerlar) taqdim etilgan.

Bundan tashqari, fuqarolarning huquqlarini himoya qilishda advokatning shoshilinch ishtirokini ta'minlash maqsadida zarur hollarda, adliya organlari tomonidan xizmat avtotransport vositalari bilan ta'minlanadi.

Komissiya qarori va yuqorida aytib o‘tgan toifalarda advokatning transport vositalariga stiker berilishi nazarda tutilmaganligi bois sizga davlat xizmatlari tomonidan stiker berilmagan.

Bundan tashqari, xabaringiz bor maxsus komissiyaning 2020 yil 8 apreldagi qaroriga asosan 2020 yil 9 apreldan boshlab avtotransport vositalari harakatlanishiga davlat xizmatlari markazlari tomonidan maxsus ruxsatnoma berish to‘xtatilgan.

Toshkent shahrida yashayman, yoshim 52 da “O‘zini yakkalash” hayot tarzidan xabarim bor. Ko‘chaga faqat oziq-ovqat va apteka uchun chiqish mumkin ekanligini aytishmoqda. Menda bitta muammo bor men har kuni 2 marta uydagi itimni ko‘chaga sayrga olib chiqardim. Endi nima bo‘ladi, itimni ko‘chaga sayr qildirish uchun olib chiqolmaymanmi?

Respublika maxsus komissiyasining qaroriga ko‘ra, Toshkent va Nukus shaharlari hamda viloyat markazlarida 2020 yil 6 apreldan “O‘zini yakkalash” hayot tarzi majburiy tarzda joriy etilgan bo‘lib, unga ko‘ra, Siz aytib o‘tganingizdek, ko‘chaga faqat birinchi galdagi hayotiy zarur bo‘lgan ehtiyojlari (oziq-ovqat, dori-darmon xarid qilish, shifokorga va ish joyiga borish) uchungina ruxsat etilgan.

Bevosita savolingizdagi holat bo‘yicha maxsus komissiyaning joriy yilning 8 apreldagi qarori bilan Toshkent, Nukus shaharlari hamda viloyatlar markazlarida uy hayvonlari (uy itlari)ni uydan 100 metr atrofida kuniga bir marotaba sayr qildirishga ruxsat berilgan

2020 yil 9 apreldan boshlab mashinalarga beriladigan ruxsatnomalar bekor qilindi deb eshitdim. Endi biz olgan stikerlarimiz ham bekor bo‘ldimi shunda?

Yo‘q stikeringiz bekor bo‘lmadi. Respublika maxsus komissiyasining 2020 yil 8 apreldagi qarori bilan 2020 yil

9 apreldan boshlab avtotransport vositalari harakatlanishiga davlat xizmatlari markazlari tomonidan maxsus ruxsatnoma berish to‘xtatilgan.

Avtotransport vositalariga 2020 yil 9 aprel kuniga qadar berilgan stikerlar haqiqiy hisoblanadi va ular asosida ko‘chada harakatlanish mumkin.

Shu o‘rinda bir narsani ta'kidlab o‘tishni joiz deb bilaman, hozirgi paytda ayrim shaxslar berilgan maxsus ruxsatnomalarni boshqa shaxslarga foydalanish uchun berayotganligi yoki ruxsatnomadan maqsadsiz foydalanayotganligi aniqlanmoqda.

Bu kabi harakatlar javobgarlikka sabab bo‘lishi va stikerlarni bekor bo‘lishiga olib kelishini yana bir bor eslatib o‘tmoqchiman.