O‘zbekistonda Ozon qatlamini buzuvchi moddalardan foydalanishni to‘xtatish bo‘yicha Milliy dastur tasdiqlanadi

Monreal protokoli bilan yuklatilgan majburiyatlarni bajarishda:

Monreal protokolida belgilangan ozon qatlamini buzuvchi moddalarni uning uchun xavfsiz bo‘lgan moddalarga almashtirish bo‘yicha talablarni o‘z muddatida bajarish;

O‘zbekiston Respublikasiga import qilinishi taqiqlangan OBM respublikaga olib kirilishini taqiqlash;

OBM foydalanadigan yoki ularga bog‘liq bo‘lgan sovitish jihozlari va havoni konditsionerlash uskunalarini taqiqlash;

2020-2030 yillarda OBM respublikaga olib kirish kvotalariga rioya qilish;

GEJ va boshqa xalqaro donor tashkilotlari yordamida ozon uchun xavfsiz moddalardan foydalanadigan texnologiyalarni ishlab chiqaradigan va joriy etadigan korxonalar, muassasalar, tashkilotlar, kompaniyalar va shaxslarga har tomonlama ko‘maklashish;

OBM o‘rnini bosuvchi ishlarning bajarilishi to‘g‘risida qaror qabul qiluvchi shaxslar va aholi xabardorligini ta'minlash;

mahalliy resurslardan foydalangan holda sovitish jihozlari va OBM bo‘lmagan mahsulotlar hamda texnologiyalarni ishlab chiqarish sohasida ilmiy tadqiqotlarni yanada rivojlantirish;

O‘zbekistonda Global isish salohiyatiga (GIS) kam ta'sir etadigan va ozonni yemirish salohiyati bo‘lmagan energiya samarador texnologiyalarni joriy etish orqali GXFU butunlay iste'moldan chiqarish kabi strategik yo‘nalishlarga amal qilish zarur.

OBM foydalanishni to‘xtatish, shuningdek, OBM o‘rnini bosuvchi moddalarni joriy etishni rag‘batlantirish yoki qayta tiklangan OBM qayta ishlatishga qaratilgan qadamlar sifatida quyidagi sohalarda ishlarni tezlashtirish va davom ettirish zarur:

eksport/import sohasida, shuningdek, litsenziyalash va kvota tizimida ishlashni davom ettirish, OBM bilan ishlovchi uskunalarni olib kirilishi bilan bog‘liq taqiqlarga qat'iy rioya etish;

yuqori global isish salohiyatiga ega gidroftoruglerod iste'molidan past yoki nolga teng bo‘lgan moddalarga bosqichma-bosqich o‘tish choralarini ko‘rish;

soliq siyosati choralari bilan birgalikda rag‘batlantiruvchi chora-tadbirlar tizimini ishlab chiqish;

ushbu ishlarga ommaviy axborot vositalarini keng jalb qilish orqali ozon qatlamini muhofaza qilishning muhimligi haqida jamoatchilikni xabardor qilish;

qaror qabul qiladigan shaxslarning salohiyatini, OBM va ularning o‘rnini bosuvchi moddalar sohasida faoliyat yuritadigan mutaxassislarning malakasini oshirish;

sovitish uskunalarini ishlab chiqaradigan va ishlatadigan, shuningdek, erituvchilar bilan ishlaydigan yirik korxonalarda OBM bog‘liq ishlab chiqarish sikllarini xalqaro hamjamiyat va mahalliy sarmoyadorlar ishtirokidagi investitsiya loyihalari orqali konvertatsiya qilish lozim.

O‘zbekiston Respublikasida birinchi Milliy dastur doirasida 3 ta ozon qatlamini buzuvchi moddalardan (XFU-12, tetraxlormetan, 1.1.1-trikloretan) foydalanishi to‘xtatildi.

Joriy Milliy dasturda esa respublikada OBMni iste'moldan to‘liq chiqarilishi, mahalliy resurslardan foydalanishni hisobga olgan holda global isish salohiyati past va ozon qatlamini buzish salohiyatiga ega bo‘lmagan texnologiyalarni joriy etish, shuningdek, O‘zbekiston Respublikasining Monreal protokoli Kigali tuzatishiga qo‘shilishining maqsadga muvofiqligini o‘rganish nazarda tutilmoqda.