17:00 / 10.05.2020
166229
Коронавирус Уҳанга қайтди

Якшанба куни Хубэй провинцияси соғлиқни сақлаш комиссияси коронавирус бутун дунёга тарқалиши ўчоғи бўлган Уҳан шаҳрида сўнгги суткада коронавирусга чалиниш бўйича битта янги ҳолат аниқлангани ҳақида хабар берди.

Фото: AP/ТАСС

Бу шаҳарда 3 апрель кунидан буён қайд этилган илк ҳолат бўлди. Бемор оғир аҳволда шифохонага олиб келинган.

Бундан ташқари, Хубэйда 17 кишида вирус аломатларсиз кечаётгани аниқланган, яна 616 нафари шифокорлар назоратида бўлиб турибди. 

Умумий ҳисобда Хитойда ўтган бир сутка ичида коронавирус билан касалланиш бўйича 14та ва касаллик белгисиз ўтаётган 20та ҳолат аниқланди. Вирус ташувчиларининг 794 нафари шифокорлар назоратида бўлиб турибди.

Янги ҳолатларнинг 12таси мамлакат ичкарисида (Цзилинда 11та, Хубэйда 1та), биттаси Шанхайда қайд этилган, бир ҳолат хориждан келган фуқарода қайд этилган.

Цзилиндаги 11 ҳолат Шулань шаҳрида яшовчи бир оила вакиллари билан боғлиқ. Улар 7 май куни коронавирус ташхиси қўйилган аёлдан вирус юқтирган.

Бу Хитойда сўнгги 10 кундаги энг юқори ўсиш бўлди. Worldometers маълумотига кўра, 29 апрель куни Хитойда 22 кишида коронавирус аниқланган ва шундан кейин айнан 10 майда сўнгги 10 кунликнинг энг юқори кўрсаткичи (14 ҳолат) қайд этилди.

Сўнгги бир кунда Хитойда коронавирус туфайли ўлим ҳолати қайд этилмаган.

Декабрь ойидан буён Хитойда коронавирусдан зарарланиш билан боғлиқ жами 82901 ҳолат қайд этилган (шундан 1683 ҳолат хориждан), 4633 киши вафот этган.

Айни вақтда мамлакатдаги шифохоналарда 148 бемор даволанишда давом этмоқда, улардан 13 нафарининг аҳволи оғир. Шифохоналардан жами 78 мингдан ортиқ киши соғайиб чиққан.

Хитойнинг материкдан ташқаридаги қисмида янги ҳолатлар қайд этилмаяпти. Ўтган йилнинг декабридан буён бу ҳудудларда жами 1529 ҳолат қайд этилган - Ҳонгконгда 1044 (4 ўлим ҳолати), Макаода 45, Тайванда 440 (6 ҳолати).

Сўнгги маълумотларга кўра, бутун дунёда вирусдан зарарланиш ҳолатлари сони 4,1 миллиондан ошиб кетган, қурбонлар сони 280 мингдан ошиқни ташкил этмоқда - сўнгги бир кунда 4404 киши вирусдан зарарланиш оқибатида вафот этган.

Сўнгги бир кунда 100 мингдан ошиқ янги ҳолат аниқланган, АҚШда – 1 309 541 (78 794 киши вафот этган), Испанияда – 223 578 (26 478), Италия – 218 268 (30 395), Буюк Британияда – 216 525 (31 662), Францияда – 176 782 (26 313), Германияда – 171 324 (7 549), Бразилияда – 156 061 (10 656), Туркияда – 137 115 (3 739), Эронда – 106 220 (6 589) ҳолат қайд этилган.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top