Sardoba fojiasida jabrlangan aholining uy hujjatlarida kamchilik bo‘lsa, ularga ham uy va moddiy yordam beriladimi?

Tadbir davomida Sardoba fojiasida jabrlangan aholining uy hujjatlarida kamchilik bo‘lsa, ularga kompensatsiya berilishi masalasi haqidagi savolga Moliya vaziri Yorqin Tursunov javob berdi.

“Prezidentimizning tashrifi arafasida bu masala ham muhokama qilindi. Bosh vazirimiz va prezident administratsiyasi rahbari Zaynobiddin Shahobiddinovich ishtirokida o‘tkazilgan majlisda bu masala ham ko‘tarildi. To‘g‘ri, bizda o‘zbek mentalitetida hujjatni to‘g‘ri rasmiylashtirib qo‘yishga ayrim holatda e'tibor qaratmaymiz. Yig‘ilishda shunday topshiriq berildiki, kadastr hujjatlari bo‘lgan uylar bo‘yicha masala yo‘q, lekin kadastri bo‘lmaganida ham atrofdagi mahalla, qo‘ni-qo‘shnilar guvohligida haqiqatda shu yerda yashagan, shunday uy mavjud bo‘lgan, degan isbotlar bo‘lsa, u uylarga ham, talafot ko‘rgan oilalarga ham uy ajratib beriladi yoki ta'mirlab beriladi”, - dedi Moliya vazirining o‘rinbosari Yorqin Tursunov.

Mazkur masala bo‘yicha Press klub raisi Sherzod Qudratxo‘jayev quyidagi fikrlarni bildirdi.

“Shu majlisda men ham ishtirok etdim. Taxminan 600 ga yaqinida kadastri yo‘q. Bu to‘g‘risida ham aytildi. Hukumat pozitsiyasi: ko‘riladi, o‘rganiladi va biz yordam beramiz, degan gap bo‘ldi. Hukumat bu yerda ham ikki qadam oldinga boryapti”, - dedi Sherzod Qudratxo‘jayev.