Yuridik universitetda yangi mutaxassislik bo‘yicha o‘qitish yo‘lga qo‘yiladi

Prezidentning “Jinoiy jazoni ijro etish tizimida ta'limni tashkil etish bo‘yicha qo‘shimcha chora-tadbirlar to‘g‘risida”gi qarori loyihasi muhokama uchun joylashtirildi.

O‘zbekiston Respublikasi Adliya vazirligi va Ichki ishlar vazirligi 2021/2022 o‘quv yilidan boshlab Toshkent davlat yuridik universitetining Ixtisoslashtirilgan filialida «Probatsiya faoliyati» mutaxassisligi bo‘yicha o‘qitishni yo‘lga qo‘yadi.

O‘zbekiston Respublikasi Vazirlar Mahkamasi huzuridagi Oliy attestatsiya komissiyasi:

Oliy malakali ilmiy va ilmiy-pedagog kadrlar ixtisosliklari ro‘yxatiga «12.00.13 – Huquqbuzarliklar profilaktikasi. Jamoat xavfsizligini ta'minlash. Probatsiya faoliyati» ixtisosligi kiritilishini;

huquqbuzarliklar profilaktikasi, jamoat xavfsizligini ta'minlash, probatsiya faoliyati sohasidagi muammolarni tadqiq etish uchun 2020 yil 1 sentyabrdan boshlab Toshkent davlat yuridik universitetining Ixtisoslashtirilgan filialida Ilmiy darajalar beruvchi ilmiy kengash ochilishini ta'minlaydi.

O‘zbekiston Respublikasi Adliya vazirligi manfaatdor vazirlik va idoralar bilan birgalikda uch oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritadi.