Erdo‘g‘an kurdlarni AQShdagi tartibsizliklarga aloqadorlikda aybladi 

Ikki prezident, shuningdek, o‘zaro suhbat davomida Liviya va Suriyadagi hamda koronavirus bilan bog‘liq vaziyatlarni muhokama qilgan.

“Prezidentimiz o‘z suhbatdoshi bilan AQShdagi zo‘ravonlik va talonchiliklar ortida turuvchi unsurlar Suriya shimolida harakat qiluvchi KIP/YPG terrorchilik tashkiloti bilan aloqaga ega bo‘lishi mumkinligi haqidagi xavotirlari bilan bo‘lishgan”, deb ma'lum qilingan Erdo‘g‘an ma'muriyati matbuot xizmatida.    

Avvalroq AQShdagi ommaviy tartibsizliklarda Rossiya ayblangandi. AQShning sobiq prezidenti Barak Obama ma'muriyatida milliy xavfsizlik bo‘yicha maslahatchi bo‘lgan Syuzan Rays Moskva AQShdagi ikki tomonni  ijtimoiy tarmoqlar orqali gij-gijlashda va ehtimol, ularni moliyalashtirayotganlikda ayblagan. Rossiyaning Venadagi xalqaro tashkilotlardagi doimiy vakili Mixail Ulyanov bu ayblovlarni inkor etib, Vashington aybdorni mamlakat ichida emas, balki tashqaridan izlashni istayotganligini qo‘shimcha qilgan. 

AQShda afroamerikalik Jorj Floyd politsiya tomonidan qo‘lga olinishi vaqtida qo‘llangan zo‘ravonlik oqibatida vafot etgandan so‘ng bir necha kundan beri noroziliklar bo‘lib o‘tmoqda. Bir qator holatlarda namoyishlar tartibsizliklar, politsiya bilan to‘qnashuvlar, talonchiliklar va bosqinchiliklarga aylanib ketgan.