Madaniyat markazlarining moddiy-texnik bazasi mustahkamlanadi - Hukumat qarori loyihasi

Vazirlar Mahkamasining “2021-2024 yillarda madaniyat markazlarining binolari kompleksini qurish va jihozlash bo‘yicha tashkiliy chora-tadbirlar to‘g‘risida”gi qarori loyihasi muhokama uchun joylashtirildi.

Prezidentning “Madaniyat va san'at sohasining jamiyat hayotidagi o‘rni va ta'sirini yanada oshirish chora-tadbirlari to‘g‘risida” 2020 yil 26 maydagi PF-6000-son farmonida madaniyat markazlari faoliyatini, jumladan, madaniyat markazlari uchun yangi bino qurish, rekonstruksiya qilish, mukammal ta'mirlash va jihozlash ishlarini tashkil etish belgilangan.

2021-2024 yillarda madaniyat markazlari uchun yangi binolar qurish, rekonstruksiya qilish, kapital ta'mirlash va jihozlash bo‘yicha manzilli ro‘yxat tasdiqlanadi.

O‘zbekiston Respublikasi Madaniyat vazirligi:

bir hafta muddatda Manzilli ro‘yxat parametrlarining o‘z vaqtida va sifatli bajarilishi yuzasidan ishchi guruhni shakllantiradi va qat'iy nazoratni ta'minlaydi;

har yili 1 iyulga qadar kelgusi yil uchun yangidan qurilishi va rekonstruksiya qilinishi belgilangan madaniyat markazlarining loyiha-smeta hujjatlarini ishlab chiqib, ularni belgilangan tartibda davlat ekspertizasidan o‘tkazilishini ta'minlaydi.

Belgilab qo‘yilishicha:

Manzilli ro‘yxatga kiritilgan madaniyat markazlarini yangidan qurish ishlari qoida tariqasida Madaniyat vazirligi tomonidan ishlab chiqilgan va belgilangan tartibda tasdiqlangan namunaviy loyihaga asosan amalga oshiriladi;

madaniyat markazlarini jihozlash ishlari ularda tashkil etilgan to‘garaklar, ijodiy jamoalar va tegishli mutaxassislar bilan ta'minlanganlik darajasidan kelib chiqib, manzilli ro‘yxatda belgilangan mablag‘lar doirasida ajratiladi.

O‘zbekiston Respublikasi Investitsiyalar va tashqi savdo vazirligi manfaatdor vazirlik va idoralar bilan birgalikda tasdiqlangan loyiha-smeta hujjatlari asosida madaniyat markazlarini yangidan qurish, rekonstruksiya qilish va jihozlash ishlarini kelgusi yillarda O‘zbekiston Respublikasining rivojlantirish davlat dasturlariga belgilangan tartibda kiritilishini ta'minlaydi.

Quyidagilar Dasturni amalga oshirishning moliyalashtirish manbalari etib belgilanadi:

a) madaniyat markazlari binolarini:

yangidan qurish, rekonstruksiya qilish va jihozlash ishlari bo‘yicha — O‘zbekiston Respublikasining rivojlantirish davlat dasturlari doirasida ajratiladigan mablag‘lar;

mukammal ta'mirlash ishlari bo‘yicha — O‘zbekiston Respublikasi Davlat budjeti mablag‘laridan maqsadli ravishda O‘zbekiston Respublikasi Madaniyat vazirligining markazlashgan xarajatlar smetasida nazarda tutiladigan mablag‘lar;

b) mukammal ta'mirlanadigan madaniyat markazlarini jihozlash ishlari bo‘yicha — O‘zbekiston Respublikasi Madaniyat vazirligi huzuridagi Madaniyat va san'atni rivojlantirish jamg‘armasi mablag‘lari;

v) xalqaro moliya institutlarining imtiyozli kreditlari va grantlari;

g) jismoniy va yuridik shaxslarning homiylik xayriyalari;

d) metsenatlik ko‘magi;

ye) qonun hujjatlarida taqiqlanmagan boshqa manbalar.

O‘zbekiston Respublikasi Iqtisodiy taraqqiyot va kambag‘allikni qisqartirish vazirligi, Moliya vazirligi Madaniyat vazirligining asoslangan hisob-kitoblariga ko‘ra, 2021 yil va keyingi yillar uchun O‘zbekiston Respublikasi Davlat budjetining parametrlarini shakllantirishda madaniyat markazlari binolarini mukammal ta'mirlash va jihozlash loyihalari uchun zarur mablag‘lar ajratish choralarini ko‘radi.

O‘zbekiston Respublikasi Madaniyat vazirligi huzuridagi “Yagona buyurtmachi xizmati” injiniring kompaniyasi madaniyat markazlarini yangidan qurish, rekonstruksiya qilish, mukammal ta'mirlash va jihozlash ishlari bo‘yicha buyurtmachi etib belgilanadi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari zarur hollarda O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan birgalikda madaniyat markazlariga yangi bino qurish uchun belgilangan tartibda yer maydonlari ajratilishini ta'minlaydi.