Davlat xizmatlari ko‘rsatish qanday baholanadi?

Adliya vazirining buyrug‘i bilan Davlat boshqaruv organlari va boshqa tashkilotlar xodimlari tomonidan davlat xizmatlari ko‘rsatilishida samaradorlik va natijadorlikning asosiy ko‘rsatkichlari hamda ularning faoliyatini baholash tartibi to‘g‘risidagi nizom tasdiqlandi.
 
Vakolatli organlar tomonidan mas'ul xodimlarning faoliyati yiliga kamida bir marotaba baholab borilishi lozim. Nizom diplomatik vakolatxonalar va konsullik muassasalariga, shuningdek tuman (shahar) davlat xizmatlari markazlarining xodimlariga tatbiq etilmaydi.
 
Norma’ning yozishicha, quyidagilar xodimlarning davlat xizmatlari ko‘rsatish faoliyati samaradorligi va natijadorligini baholashning asosiy ko‘rsatkichlari hisoblanadi:

belgilangan muddatdan oldin (kechiktirilib) ko‘rsatilgan davlat xizmatlari soni;

vakolatli organ tomonidan ko‘rsatiladigan davlat xizmatlarini takomillashtirish bo‘yicha tashabbuskorlik;

xodim tomonidan ko‘rsatilgan davlat xizmati yuzasidan foydalanuvchilardan kelib tushgan shikoyatlar soni;

xodim tomonidan ko‘rsatilgan davlat xizmati yuzasidan vakolatli organga kiritilgan taqdimnoma hamda xodimga nisbatan qo‘llanilgan ma'muriy javobgarlik choralari soni, qonun hujjatlariga muvofiq intizom ustavlar tatbiq etiladigan xodimlar bundan mustasno.
 
Har bir ko‘rsatkich bo‘yicha tegishli ballar hisoblanadi, misol uchun, muddatdan oldin ko‘rsatilgan davlat xizmatlari, ya'ni belgilangan muddatdan 50 foiz oldin va undan tezroq ko‘rsatilgan davlat xizmatlari uchun – 80 ball, 31 foizdan 50 foizgacha — 50 ball, 11 foizdan 30 foizgacha — 20 ball, 1 foizdan 10 foizgacha — 5 ball. Tegishincha, ko‘rsatkichlar yomonlashgan taqdirda ballar kamayadi.
 
Mas'ul xodimlar faoliyati natijalarini baholash uchun uch kishidan kam bo‘lmagan tarkibda, shu jumladan organ rahbari – komissiya raisi va davlat xizmatlari ko‘rsatish bilan shug‘ullanmaydigan xodimlar orasidan komissiya shakllantiriladi.
 
Baholash hisobot davridan keyingi oyning 15 sanasiga qadar amalga oshiriladi.
 
Komissiya har bir xodim bo‘yicha oddiy ko‘pchilik ovozi bilan qaror qabul qiladi. Umumiy to‘plangan ballar quyidagicha baholanadi:

86 balldan 100 ballgacha bo‘lganda — a'lo;

71 balldan 85 ballgacha bo‘lganda — yaxshi;

56 balldan 70 ballgacha bo‘lganda — qoniqarli;

55 va undan kam ball bo‘lganda — qoniqarsiz.
 
Hujjat 10.06.2020 yildan kuchga kirdi.