Behzod Musayev: Pandemiyaga qarshi kurashda kechagi strategiya bugungi kun talabiga javob bermaydi

Koronavirusga qarshi kurashish bo‘yicha kechagi taktika, kechagi strategiya bugungi kun talabiga umuman javob bermaydi, deya fikr bildirdi Bosh vazir o‘rinbosari Behzod Musayev.

«Avval virusni aniqlab, undan so‘ng davolashga o‘tgan bo‘lsak, hozirgi holat zudlik bilan yordam berish kerakligini ko‘rsatmoqda», dedi Musayev 15 iyul kuni prezident videoselektoridan so‘ng bergan intervyusida.

Hukumat vakiliga ko‘ra, Toshkent shahrida 135ta tez tibbiy yordam mashinasi bo‘lib, birinchi bosqichda zudlik bilan yana 50ta mashina ikki kun ichida jihozlanib, yo‘lga qo‘yiladi. Poytaxtdagi koll-markazda faoliyat ko‘rsatayotgan xodimlar soni 40 nafardan 100 kishiga yetkaziladi.

«Bugun Toshkent shahridagi poliklinikalarga 750ta mobil telefon yetkazib berildi. Shifokorlar kun davomida uch mahal o‘zini-o‘zi davolash bilan shug‘ullanayotgan bemorlardan qo‘ng‘iroq qilib hol-ahvol so‘raydi hamda kerakli maslahatlarni beradi», – dedi Bosh vazirning ijtimoiy rivojlantirish masalalari bo‘yicha o‘rinbosari.

U bugungi muammo nafaqat sog‘liqni saqlash tizimining, balki barcha darajadagi hokimlarning ham muammosi ekanini qayd etdi.

Musayevning so‘zlariga ko‘ra, hududdagi sektorlarning to‘rt rahbari bemorlar holatidan xabardor bo‘lishi shartligi belgilandi. Bu orqali ular aholining dard va muammolari hamda hududdagi sog‘liqni saqlash tizimi holatini yaqindan biladi.

Bosh vazir o‘rinbosari, shuningdek, pandemiya bilan bog‘liq vaziyat muhokamasiga bag‘ishlangan videoselektor yig‘ilishida dori-darmon va himoya vositalari zaxirasini shakllantirish vazifasi qo‘yilganini ham ta'kidladi.

Eslatib o‘tamiz, 15 iyul kuni prezident Shavkat Mirziyoyev pandemiya bilan bog‘liq vaziyat muhokamasiga bag‘ishlangan videoselektor yig‘ilishida Toshkent shahri va Toshkent viloyatidagi vaziyat og‘irligini qayd etib, muammolarni hal qilish choralarini belgilab berdi.