Yoshi 65dan yuqori keksalar yashovchi 106 mingta oilaga ham homiylik yordami ko‘rsatiladigan bo‘ldi

«Markaz orqali yordam to‘rt bosqichda tashkil etiladi. Birinchi bosqichda Mahalla va oilani qo‘llab-quvvatlash vazirligi tomonidan 101 980 nafar ehtiyojmand oilaning ro‘yxatini shakllantirildi. Bunga qo‘shimcha tarzda yoshi 65dan yuqori bo‘lgan keksalar istiqomat qiladigan 106 490 nafar oila ham ro‘yxatga kiritildi.

Ikkinchi bosqichda Mahalla xayriya fondining joylardagi «Saxovat va ko‘mak» jamg‘armalari orqali 30 mlrd so‘m ajratildi. Uchinchi bosqichda jamg‘armadan ajratilgan pullar va homiylar tomonidan berilgan mablag‘lar asosida oziq-ovqat mahsulotlari to‘plamlari tayyorlanmoqda.

So‘nggi bosqichda esa mahsulotlar ehtiyojmand oilalarning xonadonlariga yetkazib beriladi», dedi Sodiqjon Turdiyev Xalqaro press-klubning 20 iyuldagi sessiyasida.

XPK moderatori Sherzod Qudratxo‘jayevning Yoshlar ishlari agentligi rahbari Alisher Sa'dullayevga asoslangan holda ma'lum qilishicha, Homiylik xayriyalarini muvofiqlashtirish va volontyorlik markazlariga 14 iyuldan 19 iyulgacha bo‘lgan vaqt mobaynida oziq-ovqat mahsulotlari uchun yordam so‘rab 38 716ta murojaat kelib tushgan.

Ushbu markazlarda 2888 nafar yoshlar koll-markazlarda murojaatlarni qabul qilish, oziq-ovqat mahsulotlarini yetkazib berish uchun ko‘ngillilik asosida ishlashmoqda.

Hozirgacha 68 279 nafar yordamga muhtoj oilaga markaz orqali yordam berilgan.