Shimoliy Koreyada karantin sababli xorijiy diplomatlardan Pxenyanni tark etmaslik so‘raldi

Xabarda ta'kidlanishicha, 28 iyulda elchixona Shimoliy Koreya tashqi ishlar vazirligining bu haqidagi notasini olgan.

Notada Keson shahrida halokatli va vayronkor falokat xavfi yuzaga kelgani hamda davlatning favqulodda epidemiyaga qarshi tizimining eng yuqori toifadagi favqulodda tizimga o‘tishi sababli Shimoliy Koreyadagi diplomatik missiyalar va xalqaro tashkilotlar vakolatxonalari xodimlari rioya qilishlari kerak bo‘lgan harakatlar tartibi eslatib o‘tilgan. 

Jumladan, Shimoliy Koreya hukumati diplomatlarga poytaxt Pxenyan tashqarisiga chiqmaslikni, ommaviy tadbirlar o‘tkazmaslikni, gavjum joylarga bormaslikni, shahar bo‘ylab 4-5 kishidan ko‘proq bo‘lib sayr qilmaslikni hamda shaharga chiqqanda niqob taqishni tavsiya qilgan.

Shimoliy Koreya tashqi ishlar vazirligi “xalq farovonligi va davlat xavfsizligi ta'minlanishi uchun xorijiy diplomatlar belgilangan harakatlar tartibiga ongli ravishda amal qilishlariga” umid bildirib qolgan. 

Shimoliy Koreya hukumati 26 iyulda mamlakatda koronavirusdan birinchi kasallanish holati Janubiy Koreyadan qaytgan qochoqda aniqlangani haqida xabar berdi. Avvalroq, Shimoliy Koreya ommaviy axborot vositalari 3 yil avval qochib ketgan odam 19 iyulda qirg‘oq bo‘yidagi Keson shahriga suzib kelgani va uning yangi koronavirusga chalingani ehtimoli borligi haqida xabar bergan. Shu sababli Kesonda 24 iyulda qat'iy karantin tartibi kiritilgan. 25 iyulda esa Shimoliy Koreya rahbari Kim Chen In ushbu vaziyatni muhokama qilish uchun Koreya Mehnat partiyasi markaziy qo‘mitasining shoshilinch yig‘ilishini o‘tkazgan. U yig‘ilishda boshqa masalalar qatorida koronavirus tarqalishi oldini olish uchun maksimal shaylik holatiga o‘tish mumkinligi haqida gapirgan.  

Rasmiy ma'lumotlarga ko‘ra, bu holatgacha Shimoliy Koreyada koronavirusga chalinish holatlari qayd qilinmagandi.