08:18 / 16.08.2020
30651
Дональд Трампнинг укаси вафот этди

АҚШ президенти Дональд Трамп укаси Роберт Трамп вафот этганини маълум қилди. У 72 ёшда бўлган. АҚШ президентининг укаси аввалроқ оммадан сир сақланган “оғир ташхис” билан шифохонага ётқизилганди.  

Роберт ва Дональд Трамп Фото: AP /Diane Bonadreff

“Юракда оғриқ билан укам Роберт бугун кечаси вафот этганини маълум қилмоқчиман. У нафақат укам, балки энг яқин дўстим эди. Биз уни соғиниб қоламиз, бироқ яна у билан учрашамиз. У ҳақидаги хотира қалбимда абадий қолади. Роберт, мен сени яхши кўраман. Жойинг жаннатда бўлсин”, деб айтган Трамп.

Роберт Трамп аввалроқ Нью-Йоркдаги шифохонага оғир аҳволда ётқизилганди. АҚШ президенти шифохонада даволанаётган укасини 14 августда йўқлаганди. 

“Менинг ажойиб укам бор. Умид қиламанки, у билан ҳаммаси яхши бўлади, бироқ унга қийин бўлмоқда”, деб айтган ўшанда Трамп.

Роберт Трамп аввал акасига қарашли Trump Organization компаниясида юқори лавозимда ишлаган. У 2016 йилда New York Post нашрига берган интервьюсида акасининг АҚШ президенти лавозимига сайланишининг энг катта тарафдори эканини ва уни “минг фоизга “ қўллаб-қувватлашини айтган. 

Роберт Трампнинг номи июлда янгиликларда тилга олиниб, у ўз жияни - акаси Фреднинг қизи Мэри Трампни амакиси Дональд Трамп ҳақидаги китобни чоп этишдан қайтаришга ҳаракат қилгани маълум қилинганди. Мэри Трамп ўз китобида амакиси Дональдни отаси Фред Трамп 1981 йилда ўлим тўшагида ётганда уни йўқламаганликда айблаган.  

Top