«Aslo kutmang». Lukashenko saylov qaytadan o‘tkazilmasligini aytdi

Lukashenko hozirda mamlakat konstitutsiyasiga hukumat vakolatlarini taqsimlash ko‘zda tutilgan o‘zgartirishlar kiritish ustida ish olib borilayotganini ma'lum qildi.

Foto: RIA Novosti

Belarus prezidenti Aleksandr Lukashenko Minskdagi traktor zavodi (MZKT) ishchilari bilan muloqoti chog‘ida prezidentlik saylovi boshqa o‘tkazilmasligini aytdi, deb xabar bermoqda Sputnik Belarus.

"Bosim ostida nimadir qilishimni aslo kutmang. Boshqa saylov bo‘lmaydi. Chunki na MZKT, na MAZ, na BeLAZ qoladi, yarim yil ichida hammasini yo‘q qilamiz",- dedi Lukashenko.

Agentlikning ma'lumot berishicha, Lukashenko hozirda mamlakat konstitutsiyasiga hukumat vakolatlarini taqsimlash ko‘zda tutilgan o‘zgartirishlar kiritish ustida ish olib borilayotganini ma'lum qildi.

Lukashenko prezidentlik vakolatlarini bo‘lishishga tayyorligini aytdi.

"Ammo bosim ostida va ko‘cha orqali emas", - deb qo‘shib qo‘ydi u.

9 avgust kuni respublikada bo‘lib o‘tgan prezident saylovlaridan keyin aholi ommaviy norozilik namoyishlariga chiqa boshladi. Dastlabki kunlarda namoyishchilar kuchishlatar tuzilmalarning qattiq qarshiligiga duch keldi. Namoyishchilarga qarshi yengil granatalar, rezina o‘qlar, suv to‘plari ishlatildi va o‘qotar qurollardan foydalanildi. Bir necha kun ichida 7000dan ortiq odam qo‘lga olindi.

#Minsk #Aleksandr Lukashenko