Mahalliy kengashlar o‘z devoniga ega bo‘ladi

Xalq deputatlari viloyat, tuman va shahar kengashlari faoliyatiga bevosita ko‘maklashuvchi tuzilmani tashkil qilish orqali hokimliklarning apparati zimmasidan o‘ziga xos bo‘lmagan vazifalar soqit qilinadi.

Qonunchilik palatasining 2020 yil 21 avgust kuni bo‘lib o‘tgan navbatdagi majlisida deputatlarning qonunchilik tashabbusi bilan kiritilgan - «Xalq deputatlari kengashlari faoliyati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartishlar kiritish to‘g‘risida»gi qonun loyihasi ko‘rib chiqildi.

Loyiha bilan xalq deputatlari viloyat, tuman, shahar Kengashi faoliyatiga tashkiliy, texnikaviy va boshqa xizmatlar ko‘rsatish vazifasini endilikda xalq deputatlari kengashi kotibiyati zimmasiga yuklash nazarda tutilmoqda. Kotibiyat yuridik shaxs hisoblanib, uning faoliyati tegishli mahalliy budjet hisobidan moliyalashtiriladi.

Deputatlarning qayd etishicha, xalq deputatlari viloyat, tuman va shahar Kengashlari faoliyatiga bevosita ko‘maklashuvchi tuzilmani tashkil qilish orqali hokimliklarning apparati zimmasidan o‘ziga xos bo‘lmagan vazifalar soqit qilinadi.

Majlisda qonun loyihasi deputatlar tomonidan qabul qilindi va Senatga yuboriladigan bo‘ldi.