Chortoq tumanini ijtimoiy-iqtisodiy rivojlantirish bo‘yicha hukumat qarori qabul qilinadi
|13:53 / 27.08.20202 91514 min
Namangan viloyati Chortoq tumanini ijtimoiy-iqtisodiy rivojlantirish, muhandislik-kommunikatsiya infratuzilmasini, ijtimoiy soha obektlarini yangidan qurish mo‘ljallangan.
Prezidentning “2020-2022 yillarda Namangan viloyati Chortoq tumanini ijtimoiy-iqtisodiy rivojlantirish orqali kambag‘allikni qisqartirish chora-tadbirlari to‘g‘risida”gi qarori loyihasi e'lon qilindi.
Quyidagi asosiy ustuvor yo‘nalishlarni nazarda tutuvchi Namangan viloyatining Chortoq tumanini 2020-2022 yillarda ijtimoiy-iqtisodiy rivojlantirish orqali kambag‘allikni qisqartirish chora-tadbirlar dasturi tasdiqlanadi:
aholi bandligi darajasini oshirish hamda ishsizlik darajasini pasaytirish maqsadida tadbirkorlikni rivojlantirish, sanoat, xizmat ko‘rsatish va qishloq xo‘jaligi tarmoqlarini jadal rivojlantirish;
muhandislik-kommunikatsiya, xususan ichimlik suvi va kanalizatsiya tarmoqlarini qurish, avtomobil yo‘llari va ichki ko‘chalar holatini yaxshilash, shuningdek ko‘p xonadonli uy-joylar qurish;
ijtimoiy soha muassasalarini zamonaviylashtirish, ularni zarur jihozlar bilan ta'minlash, mutaxassislar malakasini va xizmat ko‘rsatish madaniyatini oshirish hamda bu sohada xususiy sektor ulushini ko‘paytirish;
sug‘oriladigan yerlarning meliorativ holatini yaxshilash va foydalanishdan chiqqan yerlarni o‘zlashtirish orqali qishloq xo‘jaligi mahsulotlari yetishtirishni jadal rivojlantirish.
Quyidagilar:
2020-2022 yillarda Namangan viloyati Chortoq tumanida qiymati 1,1 trln. so‘mga teng 70 ta sanoat, 73 ta xizmat ko‘rsatish va 86 ta qishloq xo‘jaligi sohasi hamda ularda 5 mingga yaqin ish o‘rinlarining yaratilishini ko‘zda tutuvchi investitsiya loyihalarining manzilli ro‘yxati;
2020-2022 yillarda Namangan viloyati Chortoq tumanida yo‘l-transport hamda muhandislik-kommunikatsiya infratuzilmasini rivojlantirish dasturining manzilli ro‘yxati;
2020-2022 yillarda Namangan viloyati Chortoq tumanida maktabgacha ta'lim yoshidagi bolalar qamrovini 65,6 foizga yetkazish maqsadida 15 ta maktabgacha ta'lim muassasasini, qo‘shimcha 1200 ta o‘quvchi o‘rni yaratish hisobiga navbatlilik koeffitsiyentini 1,2 ga pasaytirish uchun 12 ta umumiy o‘rta ta'lim maktablarini, aholiga xizmat ko‘rsatish quvvati va sifatini oshirish uchun 12 ta sog‘liqni saqlash muassasalarini hamda 6 ta boshqa ijtimoiy soha obektlarini qurish, rekonstruksiya qilish va kapital ta'mirlash bo‘yicha loyihalarning manzilli ro‘yxati;
Mavzuga oid
2020-2022 yillarda Namangan viloyati Chortoq tumani Sarkor, Mustaqillik, A.Navoiy, Do‘stlik, Zafar Diyor va Obod Diyor MFYda 3 ming 109 ta xonadonga mo‘ljallangan 50 ta ko‘p kvartirali uy-joylar qurilishining asosiy ko‘rsatkichlari;
2020-2022 yillarda Namangan viloyati Chortoq tumanida 2 ming 740 ta xonadondagi ishsiz fuqarolar bandligini ta'minlash bo‘yicha 12 mlrd.so‘m subsidiya mablag‘lari ajratish asosida yengil konstruksiyali issiqxona qurishning prognoz ko‘rsatkichlari;
2020-2022 yillarda Namangan viloyati Chortoq tumanida 7 ming 783 nafar fuqarolarning o‘zini o‘zi band qilish prognoz ko‘rsatkichlari;
2020-2022 yillarda Namangan viloyati Chortoq tumanida foydalanilmayotgan 2 ming 193 gektar yer maydonlarini o‘zlashtirish parametrlari;
Namangan viloyati Chortoq tumanida “Temir daftar”ga kiritilgan 1 ming 668 ta kambag‘al va muhtoj oilalarning 2 ming 720 nafar a'zolarining bandligini ta'minlash, doimiy daromad manbayini yaratish parametrlari tasdiqlanadi.
Prezidentning 2019 yil 30 iyuldagi PQ-4409-sonli “Xalqaro tiklanish va taraqqiyot banki ishtirokida “O‘rta shaharlarni kompleks rivojlantirish” loyihasini amalga oshirishga doir chora-tadbirlar to‘g‘risida”gi qarorida Chortoq tumani Chortoq shahrida suv ta'minoti va kanalizatsiya tizimini rekonstruksiya qilish, ko‘chalarni yoritish tizimini yaxshilash, piyodalar va velosiped eko-yo‘lakchasini qurish, avtomobil ko‘prigi (yo‘l o‘tkazgich)ni rekonstruksiya qilish va boshqa tadbirlar ko‘zda tutilgan.
O‘zbekiston Respublikasi Iqtisodiy taraqqiyot va kambag‘allikni qisqartirish vazirligi, Investitsiya va tashqi savdo vazirligi, Moliya vazirligi hamda Namangan viloyati hokimligi bilan birgalikda Jahon bankining xalqaro taraqqiyot assotsiatsiyasi va Osiyo infratuzilmaviy investitsiyalar banki ishtirokida “Qishloq infratuzilmasini rivojlantirish” loyihasi doirasida ajratiladigan kredit mablag‘lari hisobidan Namangan viloyati Chortoq tumanining qishloq hududlarida ijtimoiy soha va bazaviy infratuzilmani rivojlantirish tadbirlariga zarur mablag‘ ajratish choralarini ko‘radi.
O‘zbekiston Respublikasi Vazirlar Mahkamasi, Iqtisodiy taraqqiyot va kambag‘allikni qisqartirish vazirligi va Namangan viloyati hokimligining Chortoq tuman hokimi o‘rinbosarlari vazifalarini puxta tahlil etgan holda, ularning ayrimlarini qisqartirish hisobiga hokimiyatning mutlaqo yangi, bozor iqtisodiyoti talablariga mos zamonaviy tuzilmasini tatbiq etish taklifi ma'qullanadi hamda Namangan viloyati Chortoq tumani hokimligi boshqaruv apparatining organlarining tuzilmasi tasdiqlanadi.
Quyidagilar tegishlicha Chortoq tumani hokimligi bo‘ysunuviga o‘tkaziladi:
Chortoq tumani iqtisodiy taraqqiyot va kambag‘allikni qisqartirish bo‘limi;
Chortoq tuman hokimligi moliya bo‘limi;
Chortoq tumani investitsiyalar va tashqi savdo bo‘limi;
Chortoq tumani bandlikka ko‘maklashish markazi;
Chortoq tumani qurilish bo‘limi;
Chortoq tumani uy-joy kommunal xizmat ko‘rsatish bo‘limi.
O‘zbekiston Respublikasi Mahalla va oilani qo‘llab-quvvatlash vazirligi Namangan viloyati hokimligi bilan birgalikda 2021-2022 yillarda Chortoq tumanining 20 ta, shundan 2021 yilda kamida 10 ta mahalla fuqarolar yig‘inlariga ma'muriy bino qurish uchun “Obod va xavfsiz mahalla” jamg‘armasidan 7,0 mlrd. so‘m mablag‘ ajratilishini ta'minlaydi.
Namangan viloyati hokimligi, Investitsiyalar va tashqi savdo vazirligi va “O‘zto‘qimachiliksanoat” uyushmasining Namangan viloyatida to‘qimachilik brendini yaratish maqsadida Chortoq tumanida 100 gektar maydonda to‘qimachilikka ixtisoslashgan erkin iqtisodiy zonasini tashkil etish taklifi ma'qullanadi.
Quyidagi kichik sanoat zonalarini:
“O‘zbekneftgaz” AJ bilan birgalikda Chortoq tumani A.Navoiy MFYda joylashgan “Andijonneft” AJga qarashli bir necha yildan buyon bo‘sh turgan 2,0 gektar yer maydonini va 10,0 ming kvadrat metr bo‘lgan bino-inshootlarni bozor narxlarida baholab, Chortoq tumani hokimligi zaxirasiga o‘rnatilgan tartibda o‘tkazgan holda uning negizida “Chortoq” kichik sanoat zonasini;
zarur kommunikatsiya tarmoqlari (elektr energiya, tabiiy gaz, temir yo‘l, avtomobil yo‘li) mavjudligini hisobga olib, “Laskidon” MFY hududidagi 3,2 gektar yer maydonida “Laskidon” kichik sanoat zonasini;
tumanning “Beshkapa” MFY hududidagi “Oyqiron mirishkorlari” massivining 7 gektar yer maydonida zarur kommunikatsiya tarmoqlarini tashkil etgan holda “Oyqiron” kichik sanoat zonasini tashkil etish to‘g‘risida Vazirlar Mahkamasiga taklif kiritadilar.
Namangan viloyati hokimligiga Iqtisodiy taraqqiyot va kambag‘allikni qisqartirish vazirligi bilan birgalikda prezidentning 2020 yil 14 iyuldagi “Har bir oila - tadbirkor” dasturini hamda Namangan viloyatidagi kichik sanoat zonalarini rivojlantirishni moliyalashtirishga doir qo‘shimcha chora-tadbirlar to‘g‘risida”gi PQ-4782-sonli qarorida Namangan viloyati hokimligiga ajratiladigan 50 million AQSh dollari hisobidan tumanda sanoat tarmog‘i rivojlanmaganligini e'tiborga olib va tadbirkorlarni qo‘llab-quvvatlash maqsadida, Chortoq tumani “Beshkapa” MFY hududidagi 7 gektar maydonda tashkil etiladigan “Oyqiron” kichik sanoat zonasida ishlab chiqarish maydonlari va bino-inshootlarini qurilishiga mablag‘ yo‘naltirish topshiriladi.
Kelgusida mazkur kichik sanoat zonasida tashkil etilgan ishlab chiqarish binolari va maydonlarini tadbirkorlarga sotish yoki ijaraga bergan holda bo‘lib to‘lash tajribasini joriy etadi.
Oliy va o‘rta maxsus ta'lim vazirligi, Bandlik va mehnat munosabatlari vazirligi, Namangan viloyati hokimligi bilan birgalikda Chortoq tumani “Namangan” MFYda joylashgan Chortoq tuman 1-son kasb-hunar maktabida ishsiz yoshlar, xotin qizlar hamda o‘zining kasbiy malakasini oshirmoqchi (yangi kasb egallamoqchi) bo‘lgan fuqarolar uchun qisqa muddatli o‘quv kurslarini tashkil etadi.
Moliya vazirligi qisqa muddatli o‘quv kurslarini tashkil etish bilan bog‘liq sarf-xarajatlarga O‘zbekiston Respublikasi Bandlik va mehnat munosabatlari vazirligining asoslangan hisob-kitoblariga ko‘ra mablag‘ ajratilishini ta'minlaydi.
O‘zbekiston Respublikasi Qishloq xo‘jaligi vazirligi, Iqtisodiy taraqqiyot va kambag‘allikni qisqartirish vazirligi, Bog‘dorchilik va issiqxona xo‘jaligini rivojlantirish agentligi Namangan viloyati hokimligi bilan birgalikda 2020-2022 yillarda Chortoq tumanini meva-sabzavotchilikka ixtisoslashtirish, kam hosilli g‘alla va paxta maydonlarini qisqartirish hisobiga 2-3 turdagi eksportbop qishloq xo‘jaligi mahsulotlarini yetishtirish, jumladan 1000 gektarida sanoat usulida va tomchilatib sug‘orish texnologiyasini joriy qilib, intensiv bog‘-tokzorlarni barpo etish bo‘yicha aniq hisob-kitoblar asosida takliflar ishlab chiqib, Vazirlar Mahkamasiga kiritadi.
Bunda, Qishloq xo‘jaligi vazirligi, Investitsiyalar va tashqi savdo vazirligi, Iqtisodiy taraqqiyot va kambag‘allikni qisqartirish vazirligi qisqartirilgan maydonlarda meva-sabzavot yetishtirish, saqlash, qayta ishlash infratuzilmasini rivojlantirish uchun investitsiyalarni jalb etish, mahsulotlar bozorini topish bo‘yicha aniq dasturlar ishlab chiqilishini tashkil etadi.
Namangan viloyati hokimligining prezidentning 2019 yil 11 dekabrdagi PQ-4549-sonli “Meva-sabzavotchilik va uzumchilik tarmog‘ini yanada rivojlantirish, sohada qo‘shilgan qiymat zanjirini yaratishga doir qo‘shimcha chora-tadbirlar to‘g‘risida”gi qarorning 4-bandiga muvofiq tijorat banklari hamda Bog‘dorchilik va issiqxona xo‘jaligini rivojlantirish agentligi bilan birgalikda Namangan viloyati Chortoq tumanida hosildorligi past bo‘lgan paxta-g‘alladan bo‘shagan maydonlarda, shuningdek yaroqsiz bog‘-tokzorlar joylashgan yerlarda intensiv bog‘-tokzorlar barpo etish va ularni aholiga lizing asosida, jumladan tijorat banklari va lizing kompaniyalari orqali berish tadbirlarini tashkil etish taklifi ma'qullanadi.
O‘zbekiston Respublikasi Qishloq xo‘jaligi vazirligi, Suv xo‘jaligi vazirligi, Davlat geologiya va mineral resurslar qo‘mitasi, O‘rmon xo‘jaligi qo‘mitasi, Yer resurslari, geodeziya, kartografiya va davlat kadastri qo‘mitasi Namangan viloyati hokimligi bilan birgalikda Chortoq tumanida foydalanilmayotgan 2 ming 193 gektar yer maydonini o‘zlashtirish va tuproq-iqlim sharoitiga mos ekin turlarini joylashtirish choralarini ko‘radi.
Bunda, O‘zbekiston Respublikasi Bandlik va mehnat munosabatlari vazirligi, O‘zbekiston Fermer, dehqon xo‘jaliklari va tomorqa yer egalari kengashi jamg‘armalari hisobidan Chortoq tumanida tik quduqlarni qazish va suv ta'minotini yaxshilash, issiqxona va intensiv bog‘-tokzorlarga ajratilayotgan subsidiyaning 2020 yildagi miqdorini 2 barobarga oshiradi.
O‘zbekiston Respublikasi Bandlik va mehnat munosabatlari vazirligi, Markaziy banki Namangan viloyati hokimligi bilan birgalikda kambag‘al oilalarni kooperatsiya asosida biriktirish orqali Chortoq tumani “Balandadir” massivida joylashgan “Golden Nats” MChJ klasteri tomonidan tashkil etilgan issiqxona maydonini kengaytirish va oilaviy tadbirkorlikning boshqa yo‘nalishlari hisobiga 10 ming nafar kam ta'minlangan oilalar a'zolarining bandligini subsidiya ajratish yo‘li bilan ta'minlash choralarini ko‘radi.
Namangan viloyati hokimligi Chortoq tumanida ishsiz aholini vaqtinchalik ish bilan ta'minlash maqsadida “Golden Breder” MChJ tomonidan qiymati 3,6 mln. dollar bo‘lgan “Mehnat guzari” hamda qishloq xo‘jaligi mahsulotlari tayyorlash va eksport qilish uchun “Logistika markazi”ini tashkil etish loyihasi ma'qullanadi va zarur yer maydonini ajratish chorasi ko‘riladi.
O‘zbekiston Respublikasi Iqtisodiy taraqqiyot va kambag‘allikni qisqartirish vazirligi, Moliya vazirligi Namangan viloyat hokimligi bilan birgalikda Chortoq tumanining bosh rejasiga asosan 2020-2022 yillarda 50 ta 5-7 qavatli uy-joylar qurish choralarini ko‘radi.
Bunda, quriladigan 5 ta ko‘p qavatli uydagi xonadonlarni davlat budjetidan subsidiya berish tartibiga muvofiq kam ta'minlangan, uy-joyga muhtoj oilalarga ajratish ko‘zda tutiladi.
Turizmni rivojlantirish davlat qo‘mitasi, Namangan viloyati hokimligi, O‘zbekiston Respublikasi Fanlar Akademiyasi Madaniyat vazirligi bilan birgalikda bir oy muddatda Sulton Uvays Qaroniy ziyoratgohi va Bibi Naima ona maqbarasini keng targ‘ib qilgan holda ma'naviyat-ma'rifat markaziga aylantirish, ushbu obektlarni turistik marshrutlar arzon va qulay avtobus qatnovini yo‘lga qo‘yish, tashrif buyuradigan mahalliy va xorijiy turistlar keng tanishishi uchun Sulton Uvays Karoniy va Bibi Naima ona to‘g‘risida tarixiy ma'lumotlarni turli tillarda tayyorlab, majmuada joylashtirish va hududda o‘rindiqlar sonini ko‘paytirish bo‘yicha aniq chora-tadbirlarni amalga oshiradi.
