Bashar Asad Suriyaning yangi parlamenti tarkibini tasdiqladi

Suriya prezidenti Bashar Asad arab respublikasining yangi hukumatini tasdiqlash to‘g‘risidagi farmonini imzoladi. Bu haqda prezident kanselyariyasining Facebook’dagi sahifasida ma'lum qilingan.

Foto: Sana Sana / Reuters

Unga ko‘ra hukumatni bosh vazir Husayn Arnus boshqaradi. U sobiq bosh vazir Imod Hamisning iste'fosidan keyin, 11 iyundan buyon Vazirlar Mahkamasini vaqtinchalik boshqarayotgandi.

Bosh vazir o‘rinbosari - mudofaa vaziri Ali Ayub, bosh vazir o‘rinbosari - tashqi ishlar vaziri Volid Muallim, shuningdek, ichki ishlar vaziri Muhammad Rahmon ham o‘z lavozimlarini saqlab qolishgan.

Yangilangan hukumatda Suriya moliya vaziri o‘zgargan - bu lavozimni Kenan Yagi egallagan. Qishloq xo‘jaligi vazirligiga Muhammad Katnan, neft va mineral resurslar vaziri lavozimini Bassam Tuome egallagan. Shuningdek, mamlakat sanoat vazirligi rahbarligiga Ziyod Sabbog‘ tayinlangan.

Suriya hukumatidan jami 29 vazir o‘rin olgan — shundan ikki nafari ayollar. Ular madaniyat vazirligi hamda ijtimoiy ishlar va mehnat vazirligiga rahbarlik qilishadi.

19 iyul kuni Suriyada parlament saylovlari bo‘lib o‘tgandi. Unda «Baas» partiyasi yetakchiligidagi «Milliy taraqqiyot fronti» koalitsiyasi g‘alaba qozondi. Saylov natijalariga ko‘ra, koalitsiya parlamentdagi 250 o‘rindan 177tasiga ega chiqdi.