18:39 / 04.09.2020
11569
Суарес «Ювентус» билан келишувга эришди. Сўнгги трансфер хабарлари

Tribuna.uz куннинг асосий трансфер янгиликларини тақдим этади.

Фото: Getty Images

«Барселона» форварди Луис Суарес «Ювентус»га ўтишга яқин. Журналист Гильем Балагенинг ёзишича, уругвайлик футболчи туринликлар билан оғзаки келишувга эришган. Унинг трансфери «Барса» билан келишувга эришилмаётгани туфайли кечикмоқда. Суареснинг каталонияликлар билан амалдаги шартномаси 2021 йилгача тузилган, футболчи 2020/21 йилги мавсумда ўйинларнинг 60 фоизида иштирок этса, шартнома автоматик равишда узайтирилиши кўзда тутилган. Аммо жамоанинг янги бош мураббийи Суаресни ўз режаларига киритмаган, 33 ёшли форвард «Барселона» билан шартномасини бекор қилиши ва эркин агент сифатида янги клубга ўтиши ҳам мумкин. «Ювентус» унинг трансфери учун рамзий нарх тўлашга ҳам тайёр.

Ниҳоят «Реал» ҳам трансфер бозорида пайдо бўлмоқда. Мадридликлар «Лейпциг» ҳужумкор яримҳимоячиси Дани Ольмо учун 40 миллион евродан воз кечишга тайёр. Бу ҳақида Германиянинг Bild нашри хабар тарқатди. Немис клуби Ольмони январда 21 миллион еврода Загребдан олиб келганди. Футболчи Бундеслигада 12 ўйинда қатнашиб, 3 гол ва 1 ассистни амалга оширди.

«Челси» Кай Ҳавертц транферини яқин вақтлар ичида расман эълон қилади, деб хабар бермоқда Англияда анча ишончли саналган The Athletic. Трансфер суммаси 70 миллион фунт ва яна бир қатор бонусларни ўз ичига олган. Шартнома 2025 йилгача тузилгани айтилмоқда. Ҳавертц тиббий кўрикдан ўтиш учун Лондонга жўнаб кетганини шунингдек, Германия миллий жамоаси ҳам расман маълум қилди. Футболчи Испания билан ўйинга миллий жамоага чақирилганди, аммо захирада қолдирилди.

«Беневенто» «Фиорентина» яримҳимоячиси Бриан Дабони қўлга киритишга яқин. SportItalia нашрининг ёзишича, 28 ёшли ҳавбек учун 3 миллион евро атрофида пул тўланади. Ўтган мавсумнинг иккинчи ярмини Дабо СПАЛ таркибида ижарага ўтказди ва 16 ўйинда майдонга тушиб, 1 гол урганди.

АПЛга қайтган «Фулҳэм» таркибини «Лион» вингери Бертран Траоре билан кучайтирмоқчи. Французлар 24 ёшли футболчини сотишга тайёр, аммо камида 25 миллион евро олишмоқчи, деб хабар беради Foot Mercato. Буркина-Фасо терма жамоаси аъзоси ўтган йили Франция чемпионатида 23 ўйинда иштирок этди ва 1 гол муаллифи бўлди.

Собиқ машҳур футболчи, ҳозирда «Барселона»да мураббийлар штабига кирган Ҳенрик Ларссоннинг ўғли Жордан Ларссон бир қатор Европа клублари – «Рома», «Лацио» ва «Валенсия» каби клублар назарига тушди, деб ёзади Voetbal International. 23 ёшли ҳужумчи ўтган ёзда «Норрчёпинг»дан «Спартак»ка 4 миллион еврога трансфер қилинганди. Жорий мавсумда у москваликлар таркибида 6 учрашувда майдонга тушиб, 3 гол ва 2 ассист амалга оширишга улгурди.

«Реал» ҳимоячиси Серхио Регилон учун курашда «Манчестер Юнайтед» устунлик қилмоқда, деб ёзади Diario AS. 23 ёшли ўнг қанот ҳимоячиси жуда кўп жароҳат оладиган Люк Шоуга ўринбосар сифатида кўрилмоқда ва инглизлар 25-30 миллион евродан воз кечишга тайёр. Регилон ўтган мавсумда «Севилья»да ижара асосида тўп сурди ва яхши таассурот қолдирди, аммо Зидан уни асосий таркибга қайтармоқчи эмас. Регилон билан шунингдек, «Челси» ва «Эвертон» қизиқаётганди.

«Астон Вилла» Серхио Ромерони сотиб олишга яқин турибди. Бу ҳақда The Athletic нашри хабар тарқатди. Маълумки, Дин Ҳендерсон Манчестерга қайтгач, Ромеронинг «МЮ»даги ўрни учинчи поғонага тушиб қолди. Шунинг учун 33 ёшли аргентиналик посбон янги жамоага ўтишга қарши эмаслигини маълум қилганди. Трансфер суммаси 10 миллион фунт деб баҳоланмоқда. Шунингдек, агар «Юнайтед» Жек Грилишга қизиқишда давом эттирса, дарвозабон ўша келишувнинг бир қисми сифатида ҳам Бирминҳемга бориши мумкин.

«Рома» ҳужумчиси Патрик Шик расман «Байер» аъзосига айланишга яқин турибди. Чехиялик футболчининг нархи 26 миллион еврога тўхтади ва футболчи Германияга тиббий кўрикдан ўтиш учун боради. Патрик Шик ўтган мавсумни ҳам Бундеслигада, «Лейпциг» сафида ижарада ўтказганди. Леверкузенликлар уни яқинда «Монако»га сотиб юборилган Кевин Фолланднинг ўринбосари сифатида кўришмоқда.

«Рома» Эдин Жекони ҳам «Ювентус» ёки бошқа клубга қўйиб юборишга яқин бўлгани учун, ҳужум чизиғига турли вариантларни кўриб чиқмоқда. Асосий номзод сифатида «Ювентус» ҳужумчиси Аркадиуш Милик тилга олинаётган бўлса, шунингдек, Оливье Жиру ва Душан Тадич ҳам рўйхатда бор, деб хабар бермоқда Calciomercato.

«Шальке» клуби Ведад Ибишевичнинг трансферини расман эълон қилди. 36 ёшли ҳужумчи билан шартнома бир йилга мўлжалланган. Аввалроқ, босниялик футболчи «Ҳерта» билан шартномасини якунлаб, эркин агентга айланганди.

Ўз вақтида «Байер», «Шальке» ва Германия терма жамоасидаги ўйинлари орқали таниш бўлган Сидни Сэм Туркия чемпионатига ўтди. «Антальяспор» расмий сайти 32 ёшли футболчи билан бир йиллик шартнома имзоланганини маълум қилди. Ўтган мавсумда Сэм Австриянинг «Райндорф Алтах» клубида ижара асосида тўп сурганди, ёзда эса, эркин агентга айланди. 

«Барселона» Самюэл Умтити билан хайрлашмоқчи. Mundo Deportivo хабарига кўра, ҳозирча «Блаугране» 26 ёшли француз бўйича таклиф олмаган, лекин у клубнинг янги бош мураббий Роналд Куманнинг режаларига кирмаяпти. Луис Суарес ва Артуро Видал ортидан Умтити ҳам «Барса» сафини эркин агент сифатида тарк этиши мумкин. Умтитининг «Барса» билан шартномаси 2023 йил июнига қадар мўлжалланган.

«Севилья» ҳимоячиси Диего Карлос билан бир қатор инглиз грандлари қизиқишмоқда, деб ёзади Марса. 27 ёшли бразилиялик ҳимоячи Манчестернинг икки клуби ҳамда «Ливерпуль» эътиборида турибди. Аввалроқ, футболчининг трансфер нархи 60 миллион евро атрофида баҳоланаётганди.

«Наполи» «Арсенал» марказий ҳимоячиси Сократис Папастатопулос трансфери билан шуғулланмоқда. Бу ҳақида IlNapoliOnline хабар беряпти. 32 ёшли грециялик футболчи ўтган мавсум АПЛда 19 ўйинда майдонга тушган ва 2 гол муаллифи бўлган. «Наполи» ҳимояси етакчиси Калиду Кулибалини ушбу трансфер ойнасида ушлаб қолишга кўзи етмаётгани учун захира вариантларни кўриб чиқалаётгани тахмин қилинаётганди. Маълумки, Кулибали юзасидан Манчестернинг икки клуби ҳам сўров юборган.

Сами Хедира янги мавсумда «Зенит» либосини кийиши мумкин, деб ёзмоқда Николо Шира. Яқин кунларда «Ювентус» яримҳимоячиси эркин агентга айланади ва питерликлар у билан шартнома тузмоқчи. 33 ёшли германиялик футболчи ўтган мавсумда А Серияда 12 ўйинда майдонга тушди ва 1 голга ҳаммуаллифлик қилди.

Top