Andijonda yuk mashinasi ikki nafar qizni bosib ketib, xonadonlarning biriga borib urildi

Holat yuzasidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilgan.

2020 yilning 28 sentabr kuni soat 17:20larda Qirg‘iziston fuqarosi, 28 yoshli haydovchi Sh.L. boshqaruvidagi Volvo rusumli (Qirg‘izistonga tegishli) yuk avtomashinasida Andijon viloyati Buloqboshi tumani Sanoat MFY, Gastrol ko‘chasidan o‘tgan “Buloqboshi-Andijon” qatnov yo‘lining “Buloqboshi” yo‘nalishi bo‘yicha harakatlanib kelayotgan bo‘lgan.

O‘zbekiston Respublikasi IIV huzuridagi Tergov departamenti xabariga ko‘ra, shu vaqtda u boshqaruvni yo‘qotib, qarama-qarshi yo‘nalishga o‘tib ketib, yo‘lning chetida harakatlanib kelayotgan piyodalar, 10 yoshli B.A. (qiz) va 3 yoshli K.N.ni (qiz) bosib o‘tib, shu yerdagi xonadonlarning biriga borib urilgan. YTH natijasida piyodalar B.A. va Q.N. hamda haydovchi Sh.L. vafot etgan.

Mazkur holat yuzasidan Buloqboshi tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 266-moddasi 3-qismi “a” bandi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.

Hozirda jinoyat ishi kelgusi tergov harakatlarini o‘tkazish uchun Andijon viloyati IIB huzuridagi Tergov boshqarmasi ish yurituviga o‘tkazilgan.

“Hurmatli fuqarolar, yo‘llarda harakatlanganda belgilangan yo‘l-harakati qoidalariga hamda o‘zingizning shaxsiy xavfsizligingizga rioya qiling”, - deyiladi ma'lumotda.