Abdulla Aripov Sadir Japarovni tabrikladi

«Tabrik maktubida Qirg‘iz Respublikasi Bosh vaziri Sadir Japarovga o‘zaro manfaatli hamkorlikni barcha yo‘nalishlarda kengaytirishiga, shuningdek, mamlakatlarimiz va xalqlarimiz manfaati uchun strategik sheriklikni yanada mustahkamlashiga umid bildirilgan», deyiladi O‘zbekiston hukumati matbuot xizmati xabarida.

Ma'lumot uchun, 5-6 oktabr voqealari vaqtida namoyishchilar «Mekenchil» («Vatanparvar») partiyasi asoschisi bo‘lgan Sadir Japarovni qamoqdan ozod qilishgandi. U 2013 yilda Qorako‘lda mitinglar uyushtirgani hamda Issiqko‘l gubernatori Emilbek Kaptagayevni garovga olgani uchun 2018 yilda 11,5 yillik qamoq jazosiga hukm qilingandi.

Namoyishlar vaqtida shu yil yozidan buyon hukumatni boshqarib turgan Kubatbek Bo‘ronov iste'fo berdi.

6 oktabr kuni Qirg‘iziston parlamenti deputatlarining bir qismi Sadir Japarov nomzodini mamlakat bosh vaziri lavozimiga tasdiqladi.

Ammo 13 oktabr kuni prezident Sooronbay Jeenbekov parlament qarori yuridik kuchga ega bo‘lishi uchun deputatlarning yetarli soni unga ovoz berishi kerakligini aytib, Japarovni bosh vazir sifatida tan olmadi.

14 oktabr kuni Qirg‘iziston parlamenti Sadir Japarovni yana bir bor bosh vazirlikka tayinladi va bu safar prezident uning nomzodini qabul qildi.

Aynan uning talabi ortidan Sooronbay Jeenbekov 15 oktabr kuni Qirg‘iziston prezidentligidan iste'foga chiqdi.