Energetika vaziri Alisher Sultonov 26 oktabr kuni 2020-21 yillar kuz-qish mavsumida aholi va ijtimoiy soha muassasalari hamda strategik obektlarni uzluksiz tabiiy gaz bilan ta'minlash to‘g‘risida vazirlik buyrug‘ini imzolagandi. Unga muvofiq, Toshkent shahrining yuqori bosimli gaz quvurlariga ulangan yirik ulgurji iste'molchilar (vazirlik buyrug‘iga ilova qilingan ro‘yxat mavjud) «sanoat kollektori»ga o‘tkaziladi.
G‘isht, ohak, gips va boshqa ijtimoiy ahamiyatga ega bo‘lmagan yirik sanoat korxonalariga shu yilning 1 noyabridan boshlab tabiiy gaz yetkazib berish to‘xtatiladi.
Shuningdek, buyruqda 54ta metan gaz quyish shoxobchalarining ham grafik asosida kunlik ish faoliyati 12 soatdan oshmasligi ta'kidlangan. Ya'ni 54ta AGTKS 3 guruhga bo‘linib, har uch kunda bir marta 18ta gaz quyish shoxobchasi sutkasiga 12 soatdan ishlashi belgilangandi.
Vazirlik axborot xizmati 1 noyabr kuni tarqatgan xabarga ko‘ra, AGTKShning ish tartibiga hech qanday o‘zgartirish kiritilmagan, ya'ni buyruqda nazarda tutilgan o‘zgarish hozircha hayotga tatbiq etilmayapti.
«Energetika vazirligi 2020 yil 1 noyabrdan cheklovlar joriy etilishi rejalashtirilayogan avtomobillarga gaz quyish kompressor shoxobchalariga (AGTKSh) gaz yetkazib berish shartlari hozirda ko‘rib chiqilayotganligini ma'lum qiladi», — deyiladi xabarda.
Toshkentdagi «Pasternak» gastrobari va «Pie Republic» kafesi asoschisi Laziz G‘ulomovning UzReport telekanali muxbiriga ma'lum qilishicha, restoratorlar ham ta'minot cheklanishi haqida ogohlantirilmoqda. Ammo tadbirkorlar zudlik bilan ish faoliyatini yangi tartibga moslashtira olmaydi.
«Kafe oshxonasida ishlatilayotgan 1 kubometr gaz uchun 1000 so‘m to‘laymiz. Aholi esa xonadonga yetkazib berilayotgan gaz uchun 300 so‘m atrofida to‘lov qiladi. Umumiy ovqatlanish shoxobchasi uchun to‘lov deyarli 3 baravar qimmat qilib belgilangan. Agar gaz ta'minotidan uzilib, elektr energiyadan foydalansak, xarajatlar yana oshadi», — dedi tadbirkor.
Energetika vazirligi O‘zbekistonda faoliyat yuritayotgan barcha tadbirkorlik sub'yektlari so‘nggi yillarda ularning muqobil yoqilg‘i turlariga (suyultirilgan gaz, ko‘mir va boshqalar) bosqichma-bosqich o‘tish dasturi amalga oshirilayotganidan xabardor ekaniga shama qilgan. Vazirlik xabariga ko‘ra, xo‘jalik yurituvchi sub'yektlarning amaldagi shartnomalarida kuz-qish davrida gaz yetkazib berishga cheklovlar kiritilishi ko‘zda tutilgan bo‘lib, shuning uchun ham ular muqobil yonilg‘i manbalariga ega bo‘lishlari kerak.
