Millatlar ligasida peshqadamlik uchun kurash. Ronaldu – Mbappe, Belgiya - Angliya, Levandovski Italiyaga qarshi

«A» liga. 1-guruh: Italiya peshqadamlikni qaytara oladimi?

«A» liganing 1-guruhidagi markaziy uchrashuv yakshanba kuni Apenin yarim orolida kuzatiladi. Redjo-nel-Emiliyadagi «Chitta-del-Trikolore» stadionida Roberto Manchini boshqaruvidagi Italiya milliy jamoasi Polshaga qarshi maydonga tushadi. «Moviy gvardiya» oxirgi ikki turda g‘alaba qozona olmay - Polshada 0:0, Niderlandiya bilan esa 1:1 hisobini qayd etib, guruhdagi peshqadamlikni qo‘ldan chiqardi. Aynan ushbu tur italyanlar uchun juda muhim.

Manchini shogirdlari guruh peshqadami bo‘lib turgan Levandovski jamoasini mag‘lub eta olsa, so‘nggi tur oldidan yana 1-o‘ringa qayta oladi. 1-o‘rin uchun kechadigan kurash yakshanba oqshomidagi to‘qnashuvga bo‘lgan qiziqishni karrasiga oshiradi.

«A» liga. 2-guruh: Angliya Belgiyani bu safar ham mag‘lub eta oladimi?

 2-guruhdagi markaziy bahs Belgiya va Angliya milliy jamoalari o‘rtasida kechadi. Yakshanba oqshomida Levendagi «Den Dreyef» arenasida o‘tadigan to‘qnashuv guruh peshqadamligi uchun kechadi. Angliya so‘nggi turda Londonda Daniyadan kutilmagan mag‘lubiyatni qabul qilib olgach, Belgiya Islandiyani mag‘lub etib, 1-o‘ringa chiqib olgandi. Garet Sautgeyt shogirdlari bu bahsda xatolarini to‘g‘irlash imkoniyatiga egalar. Buning uchun inglizlar uylarida bo‘lgani kabi safarda ham Belgiya ustidan g‘alaba qozonishlari talab etiladi. Shuningdek, Daniyada ham guruhdagi peshqadamlikni qo‘lga olish uchun imkoniyat bor.

«A» liga. 3-guruh: Portugaliya Fransiya o‘rtasida peshqadamlik jangi

 Ha, shanba oqshomida Lissabondagi «Eshtadiu du Benfika» arenasida haqiqiy «jang» ko‘rsak ajab emas. Guruhda qo‘shhokimlik qilayotgan Portugaliya va Fransiya milliy jamoalari o‘zaro bahsda orani ochiq qilishadi. 4 o‘yindan keyin 10 ochkodan jamg‘argan bu jamoalarning Fransiyadagi bahsida ham g‘olib aniqlanmagan edi. Bu safargi durangga na Ronaldu jamoadoshlari, na Mbappe yetakchiligidagi fransuzlar rozi bo‘lishadi. Shunday ekan, turning markaziy to‘qnashuvidan keskin qarama-qarshilik va shiddat kutsak arziydi.

«A» liga. 4-guruh: Uch jamoada ham imkoniyat bor

Ushbu turda 4-guruhdagi Germaniya – Ukraina, Shveytsariya – Ispaniya o‘yinlari ham qiziqarli o‘tishi kutilmoqda. 4-turdan keyin guruhda Ispaniya peshqadamlik qilayotganiga qaramay, Germaniya va Ukrainada ham 1-o‘ringa qaytish imkoniyati mavjud. Uch jamoani bir ochko ajratib turibdi.

 Shuningdek, Shvetsiya – Xorvatiya, Turkiya va Rossiya milliy jamoalari o‘rtasidagi bahslar tomonlar uchun muhim ahamiyatga ega bo‘lib, shiddat va'da qilmoqda. Guruhlardagi o‘yinlar anonsi bilan tanishing:

UYeFA Millatlar ligasi. 5-tur.

 14 noyabr (shanba)

D1. 19:00. Malta – Andorra

D2. 19:00. San-Marino – Gibraltar

C1. 22:00. Ozarboyjon – Chernogoriya

C1. 22:00. Kipr – Lyuksemburg

D1. 22:00. Latviya – Farer

A3. 00:45. Portugaliya – Fransiya

A3. 00:45. Shvetsiya – Xorvatiya

A4. 00:45. Germaniya – Ukraina

A4. 00:45. Shveytsariya – Ispaniya

15 noyabr (yakshanba)

B2. 19:00. Slovakiya – Shotlandiya

C2. 19:00. Sh.Makedoniya – Estoniya

A1. 22:00. Niderlandiya – Bosniya

B3. 22:00. Turkiya – Rossiya

B4. 22:00. Bolgariya – Finlyandiya

B4. 22:00. Uels – Irlandiya

C2. 22:00. Gruziya – Armaniston

C4. 22:00. Albaniya – Qozog‘iston

C4. 22:00. Belarus – Litva

A1. 00:45. Italiya – Polsha

A2. 00:45. Belgiya – Angliya

A2. 00:45. Daniya – Islandiya

B1. 00:45. Avstriya - Sh.Irlandiya

B1. 00:45. Ruminiya – Norvegiya

B2. 00:45. Chexiya – Isroil

B3. 00:45. Vengriya – Serbiya

C3. 00:45. Moldova – Gruziya

C3. 00:45. Sloveniya – Kosovo.

 Usmon Ibodov tayyorladi