Ўзбекистонда бугунги кунга қадар электрон Kundalik тизимида рўйхатдан ўтган мактаблар сони 1557 та бўлиб, шундан 1482 та мактаб қоғоз журнал ва кундаликдан бутунлай воз кечган.

Бу ҳақда Халқ таълими вазирлиги матбуот котиби Лайло Рустамова 24 ноябрдаги брифингда маълум қилди.

Унинг сўзларига кўра, электрон обуна учун тўловни (9200 сўм) 30 ноябрдан эътиборан амалга ошириш мумкин.

«23 ноябрдан синов муддатининг охирги 7 куни бошланган. Ота-оналарга ўзларининг профилларидан кириш ва барча фарзандларининг кундаликларини кўра олаётганликларини текширишлари тавсия этилади», – деди вазирлик вакили.

Электрон кундалик хорижий компанияники бўлса, бу болаларнинг маълумотларини хавфга қўймайдими? Ушбу саволга Лайло Рустамова қуйидагича жавоб берди.

«Электрон кундалик фойдаланувчилари тўғрисидаги барча маълумотлар «Ўзбектелеком» серверларида сақланади. Бу эса, ўқув жараёнидаги барча иштирокчиларнинг шахсий маълумотлари ишончли ҳимоясини таъминлайди. Бундан ташқари, Kundalik.com TAS-IX ҳудудида жойлашган бўлиб, платформа билан ишлашда уяли алоқа операторлари орқали фойдаланилганда интернет-трафик сарфланмайди.

Агар электрон кундаликни қўллаш бўйича саволлар юзага келса, уларга жавобларни компаниянинг қўллаб-қувватлаш хизматига +998 (78) 888-82-82 рақами орқали мурожаат қилган ҳолда олиш мумкин».