Rossiyada migrantlarning vaqtinchalik bo‘lish muddati uzaytirildi

Qayd etilishicha, Rossiya prezidenti Vladimir Putinning tegishli farmoni huquqiy ma'lumotlarning rasmiy internet portalida e'lon qilindi.

«Rossiya Federatsiyasi prezidentining 2020 yil 18 apreldagi 274-sonli «Rossiya Federatsiyasidagi xorijiy fuqarolar va fuqaroligi bo‘lmagan shaxslarning huquqiy holatini yangi koronavirus infeksiyasi keng tarqalishi xavfi munosabati bilan tartibga solish bo‘yicha vaqtinchalik chora-tadbirlar to‘g‘risida»gi farmoniga quyidagi o‘zgarishlar kiritilsin: a) 1-bandning birinchi xatboshidagi «2020 yil 15 dekabrgacha» degan so‘zlar «2021 yil 15 iyunga qadar» degan so‘zlar bilan almashtirilsin», - deyiladi hujjatda.

Avvalroq, Rossiyada o‘zbekistonlik mehnat migrantlariga 15 dekabrgacha imtiyozlar berilishi xabar qilingandi. 

Rossiya hududida nolegal bo‘lib turgan O‘zbekiston fuqarolari ro‘yxatdan o‘tish va ruxsat beruvchi boshqa hujjatlarning amal qilish muddati tugashidan (15 martgacha yoki undan keyin) qat'i nazar yashash manzili bo‘yicha Rossiya Federatsiyasi IIV organlariga murojaat qilib, 2020 yilning 15 dekabriga qadar mamlakatda bo‘lishni qonuniylashtirishi mumkin.

Fuqarolarga nisbatan ma'muriy chiqarib yuborish, deportatsiya qilish, ilgari berilgan vaqtinchalik yashash uchun ruxsatnoma, yashash uchun ruxsatnoma, ishlash uchun ruxsatnoma va patentni bekor qilish, shuningdek Rossiyaga kirishni taqiqlash kabi choralar qo‘llanilmaydi.