Ayrim soliq stavkalari 2021 yil fevralda o‘zgaradi. Benzin narxi yana oshadi

{Yii::t(}

O'tkazib yuborish 6s

O'tkazib yuborish

O‘zbekiston milliy valutasida belgilangan ayrim aksiz solig‘i stavkalari joriy yil aprel-may oylarida oshirilishi rejalashtirilgandi. Ammo pandemiya sababli ushbu chora-tadbirlar kechiktirilgan. Aksiz solig‘i stavkalarini indeksatsiyalash 2021 yil fevral oyida o‘tkazilishi mumkin, deb xabar bermoqda Kun.uz muxbiri.

Moliya vaziri o‘rinbosari Dilshod Sultonovning aytishicha, aksiz solig‘i stavkasidagi o‘zgarish asosan alkogol, tamaki hamda benzin mahsulotlari narxiga ta'sir qiladi.

«Import bo‘yicha 73ta tovar pozitsiyasiga aksiz solig‘ini bekor qilish taklif etilmoqda. Xususan, oziq-ovqat mahsulotlari (20 turdagi tovarlar (sharbatlar, pishloq, tvorog, margarin, unli qandolat mahsulotlari, kolbasa va shunga o‘xshash go‘sht mahsulotlari va h.k.), elektrotexnika tovarlari bo‘yicha (35 turdagi tovarlar (muzlatgichlar, televizorlar, gaz plitalari, changyutgichlar, kir yuvish mashinalari va h.k.) va h.k. Bu tadbirkorlik sub'yektlariga teng sharoitlarni ta'minlashga imkon beradi», — deydi u.

Bundan tashqari, 2021 yilda mobil aloqa xizmatlari uchun aksiz solig‘i stavkasini 15 foiz etib belgilash taklif etilgan. Joriy yil ushbu stavka 20 foizga teng bo‘ldi.

Ma'lumot uchun, 2021 yilgi soliq siyosatining asosiy yo‘nalishlarida QQS (15 foiz), foyda solig‘i (15 foiz, alohida toifalar uchun 20 foiz), jismoniy shaxslardan olinadigan daromad solig‘i (12 foiz), yuridik shaxslardan olinadigan mol-mulk solig‘i (2 foiz), qishloq xo‘jaligiga mo‘ljallangan yerlar uchun yer solig‘i (0,95 foiz), ijtimoiy soliq (xo‘jalik yurituvchi sub'yektlar - 12 foiz va budjet tashkilotlari - 25 foiz), aylanmadan olinadigan soliq (bazaviy stavka 4 foiz) stavkalari saqlab qolinishi nazarda tutiladi.

Avvalroq, «O‘zbekneftgaz» AJ matbuot xizmati 2021 yildan avtomobil yonilg‘isi narxlari oshishi haqida tarqalgan xabarlarga munosabat bildirgandi. Xususan, jamiyat quyidagi neft mahsulotlariga va yakuniy iste'molchiga sotiluvchi tovarlarga solinadigan aksiz solig‘i stavkalariga o‘zgartirish va qo‘shimcha kiritilishi ko‘zda tutilayotgani haqida ma'lumot bergan:

Neft mahsulotlari:

• 1 tonna Ai-80 benzini: amalda – 200 000 so‘m, taklif – 240 000 so‘m;
• 1 tonna Ai-80, Ai-92, Ai-93 va Ai-95 benzini: amalda – 250 000 so‘m, taklif – 275 000 so‘m;
• 1 tonna dizel yonilg‘isi: amalda – 200 000 so‘m, taklif – 240 000 so‘m;
• 1 tonna EKO dizel yonilg‘isi: amalda – 180 000 so‘m, taklif – 216 000 so‘m.

Yakuniy iste'molchiga sotiluvchi tovarlarga solinadigan aksiz solig‘i:

• 1 tonna benzin: amalda – 378 480 so‘m, taklif – 465 530 so‘m;
• 1 tonna dizel yonilg‘isi: amalda – 346 275 so‘m, taklif – 425 918 so‘m.

Yuqoridagi o‘zgarishlar respublikada ommabop bo‘lgan Ai-80 benzini misolida 1 tonnasi 127 050 so‘mga (QQSni hisobga olganda 146 108 so‘mga) yoki 1 litri 95 so‘mga (QQSni hisobga olganda 110 so‘mga) oshishi mumkin.