«Rosselxoznadzor» O‘zbekiston pomidori va qalampirini olib kirish uchun qo‘yilgan vaqtinchalik taqiqni qisman bekor qildi

“Rosselxoznadzor” joriy yilning 18 dekabridan boshlab Farg‘ona viloyatida joylashgan 7ta korxonadan pomidor va qalampir mahsulotlarida 2020 yilda YeOII davlatlari uchun karantin obektlar va pomidor jigarrang bujmayishi virusi aniqlanmaganligi tufayli ushbu korxonalardan Rossiya hududiga mazkur mahsulotlarni olib kirishga ruxsat berdi. Bu haqda “O‘zdavkarantin” inspeksiyasi axborot xizmati xabar qilgan.

“Rosselxoznadzor” saytida e'lon qilingan ma'lumotga ko‘ra, mazkur qaror Vazirlar Mahkamasi huzuridagi O‘simliklar karantini davlat inspeksiyasi tomonidan Farg‘ona viloyatida hududlarni o‘rganish natijalari va issiqxonalar holatini tahlil qilish to‘g‘risida taqdim etilgan ma'lumotlar asosida qabul qilingan.

Dastlabki bosqichda pomidor mahsulotini «Golden Tree» MChJ (Qo‘shtepa tumani), «Farhod Rancho» FX (Quvasoy shahri), «Farg‘ona Ziyo quruvchi» MChJ (Quvasoy shahri) hamda qalampir mahsulotini «Novaya volna» FX (Oltiariq tumani), «Jilokor Zamini» MChJ (Dang‘ara tumani), «Saodatli Dil Farovon» MChJ (Dang‘ara tumani), «Yuldashev Eldor» MChJ (Beshariq tumani) korxonalaridan olib kirishga ruxsat etildi.

O‘simliklar karantini davlat inspeksiyasi “Rosselxoznadzor” bilan vaqtinchalik cheklovlarni bekor qilish yuzasidan muvofiqlashtirilgan qo‘shma tadbirlar davom etayotganini ma'lum qildi.