Qarshi tumani hokimi ishga qaytdi va o‘zi qatnasha olmagan sessiyani qaytadan o‘tkazdi

22 dekabr kuni xalq deputatlari Qarshi tuman kengashining navbatdagi sessiyasi takroran bo‘lib o‘tdi. Unda sog‘ayib ishga qaytgan tuman hokimi Maqsuda Mustafoyeva tuman ahli va deputatlarga murojaat qilgan.

Kun.uz muxbiri xabar berishicha, tuman hokimi bundan bir hafta avval, 15 dekabr kuni bo‘lib o‘tgan sessiyada sog‘lig‘idagi muammolar tufayli qatnasha olmagani uchun sessiyani qaytadan o‘tkazayotganini aytgan.

«O‘tgan safar ma'lum sabablarga ko‘ra aynan o‘zimning fuqarolik huquqimdan foydalangan holatda 6 kunlik byulletenga chiqqanligim va o‘z navbatida ishtirok eta olmaganligim sababli uzr so‘rayman. Shu sessiyani boshqatdan o‘tkazish uchun, bugun yana yig‘ilganimiz uchun sizlardan yana bir bor kechirim so‘rayman», degan tuman hokimi.

Eslatib o‘tamiz, 15 dekabr kuni bo‘lib o‘tgan xalq deputatlari Qarshi tuman kengashining navbatdagi sessiyasida tuman hokimi Maqsuda Mustafoyevaning tuman aholisiga murojaat qilishi reja qilingandi. Ammo sessiya ishida tuman hokimi qatnashmagan va uning o‘rniga o‘rinbosari Sardor Abdullayev aholiga murojaat qilgandi.

Qarshi tuman hokimining sessiyada qatnashmagani ijtimoiy tarmoqlarda keng muhokamalarga sabab bo‘lgach, tuman hokimligi axborot xizmati Maqsuda Mustafoyeva betobligi tufayli sessiyada qatnasha olmaganini ma'lum qilgandi.

Maqsuda Mustafoyeva 2020 yil 4 mart kuni Qarshi tumani hokimi etib tayinlangan edi. U internetda shu yilning yozida Sulton Tex Group ishidagi ishtiroki tufayli ham tanilgandi.