Энергетика вазирлиги матбуот хизмати хабарига кўра, қуввати 100 МВт бўлган ФЭС қурилиши лойиҳаси давлат-хусусий шериклиги асосида амалга оширилмоқда.
Электр станциясининг ишга туширилиши жорий йилнинг октябрь ойига режалаштирилган. У қайта тикланувчи энергия манбалари асосида фаолият юритувчи саноат миқёсидаги илк генерация қилинадиган электр станцияси бўлади.
Қурилиш майдончасида объект қурилиши учун зарур бўлган барча инфратузилма мавжуд. Вазирлик қурилиш жойидан тайёрланган фотоҳисобот тақдим этган.
Эслатиб ўтамиз, аввалроқ Энергетика вазирлиги давлат-хусусий шериклик асосида қуёш фотоэлектр станцияси қурилиши бўйича «Scaling Solar 3» учинчи лойиҳаси бошланиши тўғрисида эълон қилганди.
«Scaling Solar 3» учинчи лойиҳаси доирасида умумий қуввати 500 МВт бўлган учта ФЭС қурилиши режалаштирилиб, уларнинг инвесторлари тендер натижасига кўра аниқланади.
Учинчи лойиҳа бошланиши 2021 йил феврал ойига режалаштирилган. ФЭС қурилиши Бухоро, Наманган ва Хоразм вилоятларида амалга оширилиши кўзда тутилмоқда.
