O‘zbekiston yana bitta yangi «Boeing-787-8» samolyotini xarid qiladi

Joriy yilning mart oyida «Uzbekistan Airways» AJ yangi «Boeing-787-8» samolyotini xarid qilishi kutilmoqda. «Drimlayner»ning xarid qiymati 141,7 million dollar bo‘lib, shundan 107,1 million dollari Xitoy davlat taraqqiyot banki tomonidan ajratilgan kredit mablag‘lari hisobidan moliyalashtiriladi. Bu haqda 2021-2023 yillarga mo‘ljallangan investitsiya dasturida ma'lum qilindi.

Ta'kidlanishicha, samolyot xaridining milliy valutadagi qiymati 1 trillion 544 milliard so‘m bo‘lib, shundan 7,6 milliard so‘mi Tiklanish va taraqqiyot jamg‘armasi mablag‘lari hisobidan qoplanadi. Xarid maqsadida jalb etilgan to‘g‘ridan to‘g‘ri investitsiya esa 369,5 milliard so‘mni tashkil etmoqda.

2020 yil 16 mart kuni hukumatning tegishli qarori bilan, «To‘rtta yangi   «Boing-787-8» samoliyotini xarid qilish» investitsiya loyihasining texnik-iqtisodiy asoslari tasdiqlangandi.

Hujjatga ko‘ra, «Boeing-787-8» samolyotlari oxirgi 3 yilda Xitoy davlat taraqqiyot banki tomonidan ajratilgan kredit mablag‘lari hisobidan sotib olingan. Shuningdek, samolyotlar xaridi uchun Tiklanish va taraqqiyot jamg‘armasi kreditlari, boshqa moliyalar ham yo‘naltirilgan.

Ma'lumot uchun, «Boeing-787-8» havo kemalari yonilg‘i sarflash samaradorligini oshirish, shovqin darajasini pasaytirish va atmosferaga SO2 gazining ajralib chiqishini kamaytirish imkonini beruvchi GE Aviation kompaniyasining GEnx-1B dvigatellari bilan jihozlangan.

Avvalroq, «Uzbekistan Airways» 150 o‘ringa mo‘ljallangan «Airbus A320 Neo» sotib olgani haqida xabar berilgandi.