Kun.uz’ga navbatdagi murojaat Samarqand viloyati Ishtixon tumani «Humo» mahalla fuqarolar yig‘ini Chayjaul qishlog‘i aholisidan yo‘llandi. Unda yozilishicha, qishloqda bitta transformator bor. Aholi xonadonlarining soni me'yordan oshib ketgani uchun elektr energiyasi bilan yetarli darajada ta'minlashda uning quvvati yetmayapti. Qishloq ahlining bir qismi pul yig‘ib o‘z hisobidan sotib olingan yog‘ochlardan qo‘lbola simyog‘och tayyorlab, ikki kilometr uzoqlikdagi maktab transformatoriga ulangan. Ammo uning ham quvvati past. Shuningdek, qo‘lbola simyog‘ochlar ham omonat turibdi.
«Samarqand viloyati Ishtixon tumani «Humo» mahalla fuqarolar yig‘ini tarkibidagi Chayjaul qishlog‘i fuqarolari nomidan murojaat qilyapmiz. Aholi xonadonlari ko‘p bo‘lsa-da, qishloqqa bir dona transformator qo‘yilgan. Uning quvvati barchaga yetmaydi. Shu sababli, o‘z hisobimizdan simyog‘och tayyorlab, 2 kilometr uzoqlikda joylashgan maktab transformatoriga ulanganmiz. Shunda ham elektr energiyasining quvvati kamlik qilyapti. Simyog‘ochlar qo‘lbola bo‘lganligi uchun xarob ahvolda. Aksariyati chirib bo‘lgan. Farzandlarimiz maktabga borgan paytda yoki ko‘chaga o‘ynab chiqqanda xavotirda o‘tiramiz. Quvvat kamligi sabab ko‘pchilikning xo‘jalik texnikalari kuyib qolgan, buzilgan. 2019 yildan buyon bu masalani tuman hokimining sayyor qabullarida ham bir necha marta ko‘tardik, ammo, natija bo‘lmadi. Aholi tomonidan tuman elektr tarmoqlari korxonasiga, tuman deputatiga yozma, yana Xalq qabulxonasi, Bosh prokuratura, Prezident portali, viloyat hokimi telegram messenjeriga murojaat qilganmiz, ammo hech kimni biz duch kelayotgan muammo bilan ishi yo‘q», deyiladi murojaatda.
Qishloq ahlining bildirishicha, ularning Prezident portaliga qilgan murojaatiga 2020 yil 15 sentyabr kuni «Samarqand hududiy elektr tarmoqlari» AJ rahbari U.Jo‘rayev nomidan javob xati berilgan. Unda qishloq ahlining Sherali Shakarov nomidan Prezident portaliga qilingan murojaati «Samarqand hududiy elektr tarmoqlari» AJ tomonidan o‘rganib chiqilgani, Chayjaul qishlog‘idagi past kuchlanishli elektr energiyasi ta'minotini yaxshilash ishlari Prezidentning 2016 yil 23 noyabrdagi PQ 2661-sonli «2017-2021 yillarda past kuchlanishli elektr tarmoqlarini yanada modernizatsiya qilish va yangilash dasturi to‘g‘risida»gi qaroriga asosan 2020 yil sentyabr oyida amalga oshirishi ma'lum qilingan. Ammo murojaatda yozilishicha, sentyabrda ham, undan keyin ham hech bir ish qilinmagan.
Murojaat yuzasidan izoh olish uchun avval Ishtixon tuman elektr tarmoqlari korxonasi rahbari Sardor Ortiqov bilan bog‘landik. U Chayjaul qishlog‘i aholisi duch kelayotgan muammodan xabardorligini bildirdi. Uning aytishicha, rejaga ko‘ra Chayjaul qishlog‘ida amalga oshirilishi lozim bo‘lgan ishlarni 2020 yilda yuz bergan pandemiya sababli amalga oshirishning iloji bo‘lmagan.
