Vazirlik mutasaddisi darsliklarda yo‘l qo‘yilgan xatolar yuzasidan izoh berdi

Joriy yilning 22 yanvar kuni maktab darsliklari bilan bog‘liq muammolarga bag‘ishlangan brifing o‘tkazildi. Unda xalq ta'limi vazirining birinchi o‘rinbosari Usmon Sharifxo‘jayev darsliklarda yo‘l qo‘yilgan xatolar yuzasidan ijtimoiy tarmoqlarda tarqalgan ma'lumotlar haqida gapirdi.

Unga ko‘ra, darsliklar bir marta chop etilgach, bir necha yil davomida ijara asosida foydalaniladi. Bir yilda 600 mingdan ortiq adadda darsliklar chop etiladi. Xatoga yo‘l qo‘yilgan bo‘lsa, mas'ulga nisbatan chora ko‘riladi, biroq to‘liq tirajni qayta chop etish imkoni deyarli yo‘q. Har yili o‘sha darslikka duch kelgan ota-onalar o‘sha xatolarni qayta-qayta tarmoqqa qo‘ymoqda. 

«Bugun ijtimoiy tarmoqlarda darsliklar bilan bog‘liq ko‘tarilayotgan masalalar ko‘p. O‘sha darsliklarni olib, chop etilgan sanasiga qaraydigan bo‘lsak, u 2017 yilda, 2018 yilda chop etilganini ko‘rish mumkin. Darsliklar bo‘yicha katta ishlar boshlangan. Kim bu jarayonlarni o‘z ko‘zi bilan ko‘rishni istasa, Respublika ta'lim markaziga taklif etamiz. Yangi milliy o‘quv dasturiga mos ravishda, darsliklar to‘liq yangilanmoqda», - dedi vazirlik mutasaddisi.