Portugaliyada prezident saylovlari bo‘lib o‘tadi

Shu munosabat bilan saylov uchastkalari mahalliy soat 8dan ochilib, 19gacha ishlaydi. Aholisi 10 mlndan oshadigan Portugaliyada 9 mlndan ko‘proq kishi ovoz berish huquqiga ega.

Mamlakat qonunchiligiga ko‘ra, prezident 5 yilga saylanadi. Amaldagi prezident, 72 yoshli Rebelu di Souza 2016 yildan beri ushbu lavozimni egallab keladi va joriy saylovlar favoriti hisoblanadi. 

Agar nomzodlardan birortasi 50 foizdan ko‘proq ovoz to‘play olmasa, unda 14 fevralda saylovlarning 2-bosqichi bo‘lib o‘tadi.

Portugaliya konstitutsiyasiga ko‘ra, davlat suvereniteti, birdamligi va hududiy yaxlitligi kafili hisoblanadigan prezidentning vakolatlari juda keng bo‘lib, u oliy bosh qo‘mondon hisoblanadi, saylovlar natijalarini hisobga olib bosh vazirni tayinlaydi, hukumat taklifi va parlament ma'qullovi bilan urush e'lon qilishi va tinchlik sulhi tuzishi, favqulodda vaziyat e'lon qilishi mumkin.

Portugaliya prezidentining muhim vakolatlaridan biri mamlakat parlamentini tarqatib yuborishi mumkinligi hisoblanadi. 

Oxirgi so‘rovnomalarga ko‘ra, amaldagi prezident saylovlarda ishonchli g‘alabaga erishishi kutilmoqda. Unga saylovchilarning 63 foizi o‘z ovozini berishi mumkin. 

Portugaliyada saylovlar pandemiya sharoitida o‘tkazilmoqda. Mamlakatda so‘nggi sutkada koronavirusga chalinish bo‘yicha rekord ko‘rsatkich qayd qilindi. Hozirda respublikada favqulodda vaziyat rejimi amal qilmoqda. 

Shu sababli saylovlar karantin cheklovlariga amal qilgan holda o‘tkaziladi. Jumladan, hukumat muddatdan avval ovoz berish uchun ko‘proq vaqt ajratdi, ovoz berish joylari sonini ko‘paytirdi. Saylovchilar saylov uchastkalariga himoya niqoblarida kelishlari belgilab qo‘yilgan. Uchastkalarda muntazam ravishda dezinfeksiya ishlari olib boriladi. Saylovlargacha 10 kun ichida kasallanganlar ovoz berishda ishtirok eta olmaydilar.