Endi kadastr ishlari bilan xususiy sektor shug‘ullanadimi? Hukumat qarori loyihasi jamoatchilik muhokamasiga qo‘yildi

Normativ-huquqiy hujjatlar loyihalari muhokamasi portaliga Vazirlar Mahkamasining «Kadastr ishlarini bajarish sohasida davlat organlari funksiyasini xususiy sektorga o‘tkazish to‘g‘risida»gi qarori loyihasi jamoatchilik muhokamasi uchun joylashtirildi.

O‘zbekiston prezidentining 2019 yil 5 apreldagi qarori bilan 2020 yil 1 yanvardan boshlab tajriba-sinov tariqasida Toshkent shahri va viloyatida ko‘chmas mulk bo‘yicha kadastr muhandisi instituti joriy etilgan edi.

Yangi qaror loyihasida o‘tkazilayotgan sinov jarayoni 2022 yil 31 dekabrga qadar amal qilishi belgilanmoqda.

Hujjat bilan Toshkent viloyati va Toshkent shahrida ko‘chmas mulk bo‘yicha kadastr muhandisining malaka shahodatnomasini berish tartibi to‘g‘risidagi nizom va mazkur ikki hudud kadastr muhandislari tomonidan ko‘chmas mulk obektlariga kadastr yig‘majildi tayyorlash bo‘yicha ko‘rsatiladigan xizmatlar narxining minimal stavkalari tasdiqlanishi belgilangan.

Qaror loyihasida uch oy muddatda kadastr muhandislari tomonidan ko‘chmas mulk obektlariga kadastr yig‘majildini, shu jumladan, birlamchi kadastr yig‘majildini tayyorlash jarayonlarini amalga oshirish imkoniyatini beruvchi hamda Kadastr agentligi tomonidan monitoringi yuritiluvchi maxsus avtomatlashtirilgan axborot tizimini ishlab chiqish nazarda tutilmoqda.

Bunda axborot tizimini ishlab chiqish, ishchi holatini ta'minlash va rivojlantirish Kadastr agentligining budjetdan tashqari jamg‘armasi mablag‘lari hisobidan amalga oshiriladi.

Hujjatda manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirishi, tajriba-sinov natijalari bo‘yicha 2022 yil 1 noyabrga qadar Vazirlar Mahkamasiga taklif kiritishi belgilanmoqda.

Shuningdek, kadastr yig‘majildini tayyorlash jarayonlarini amalga oshirish imkoniyatini beruvchi avtomatlashtirilgan axborot tizimini saqlash va takomillashtirish maqsadida, Kadastr agentligi tomonidan har bir ko‘chmas mulk bo‘yicha so‘rov uchun bazaviy hisoblash miqdorining 10 foizi miqdorida to‘lov undirilishi belgilanishi kutilmoqda.

«Toshkent viloyati va Toshkent shahrida ko‘chmas mulk bo‘yicha kadastr muhandisining malaka shahodatnomasini berish tartibi to‘g‘risida»gi nizomdan malaka imtihonini topshirish, apellyatsiyani ko‘rib chiqish, malaka shahodatnomasini rasmiylashtirish va berish, hujjat amal qilishini tugatish va uni bekor qilish, kadastr muhandislari reyestrini yuritish tartiblarini belgilash masalalari o‘rin olgan.

Yana, shuningdek, ko‘chmas mulk bo‘yicha kadastr muhandisligiga talabgorlarga quyidagi imkoniyatlar yaratilishi ko‘zda tutiladi:

• ko‘chmas mulk obektlariga birlamchi kadastr yig‘majildini tayyorlash huquqi berilishi;
• o‘z faoliyatini yuridik shaxslar bilan mehnat shartnomasini tuzish orqali yoki yakka tartibdagi tadbirkor sifatida amalga oshirishi;
• kadastr yig‘majildini tayyorlash bo‘yicha xizmatlar uchun narxlar tadbirkorlik sub'yekti tomonidan mustaqil ravishda Vazirlar Mahkamasi tasdiqlaydigan minimal stavkalardan kam bo‘lmagan miqdorda belgilanishi;
• malaka imtihonini topshirish uchun beriladigan vaqtning bir soatdan ikki soatga uzaytirilishi;
• test sinovi natijalari uch kun ichida emas, test sinovi yakuni bilan e'lon qilinishi.

Nizomga muvofiq, kadastr muhandisi Toshkent viloyati va Toshkent shahri hududida shartnoma asosida quyidagi kadastr xizmatlarini ko‘rsatadi:

• ko‘chmas mulk obektlarini xatlovdan o‘tkazish;
• ko‘chmas mulk obektlarining qavatma-qavat rejalarini tuzish;
• ko‘chmas mulk obektlari texnik rejalarini rasmiylashtirish;
• ko‘chmas mulk obektlarini texnik hisobga qo‘yish.

Qaror qabul qilinishi bilan kadastr yo‘nalishida davlatning iqtisodiyotdagi ishtirokini qisqartirish, raqobatbardosh muhitni shakllantirish, tadbirkorlikning kadastr yo‘nalishida rivojlantirishga qo‘shimcha imkoniyatlar yaratish va bir necha samarali natijalarga erishish ko‘zda tutilgan.