Yangiqo‘rg‘onda kartoshkaga ixtisoslashtirilgan tomorqa klasteri tashkil etiladi

Viloyat fermerlar kengashidan Kun.uz'ga ma'lum qilishlaricha, loyiha qiymati – 4,6 mlrd so‘m.

Bu mablag‘larga Niderlandiyadan 525 tonna, shundan Fermerlar kengashi huzuridagi jamg‘arma hisobidan ajratilgan 3 mlrd so‘mlik mablag‘ evaziga 325 tonna, aholining 1,8 mlrd so‘mlik mablag‘lari hisobidan 200 tonna super elita kartoshka urug‘lari olib kelingan.

Kartoshkachilik tajribasiga ega 3780 ta xonadondagi 150 gektar maydonda jami 525 tonna 8 xil navli (shundan «Sante» 85 tonna, «Silvana» 10 tonna, «Primabella» 60 tonna, «Sagita» 21,2 tonna, «Lizetta» 59,5 tonna, «Konstansa» 105 tonna, «Arnova» 138 tonna, «Lusinda» 46 tonna) yuqori reproduksiyali kartoshka urug‘lari ekilib, 5250 tonna birinchi avlodli kartoshka urug‘ligi yetishtirilgan.

Hisob-kitoblarga ko‘ra, yetishtirilgan urug‘lik 75 ming xonadonning 1540 gektar maydoniga yetadi, kelgusida 46,2 ming tonna kartoshka yetishtiriladi.

Sifatli kartoshka urug‘ligi ekilishi hisobiga viloyatda qo‘shimcha 30 ta MFY 101 mingta xonadonda «Bir mahalla – bir mahsulot» tamoyili asosida kartoshka ekilishi tizimiga o‘tadi.

Sifatli kartoshka urug‘i yetkazib berish, belgilangan agrotexnik tadbirlarni amalga oshirish, sohaga ilg‘or tajribalarni joriy etish, provardida viloyatda kartoshka urug‘chilik bazasini yaratish maqsadida Tomorqa xizmati korxonasi negizida «Kartoshkachilik» tomorqa klasteri tashkil etish rejalashtirilgan.