Bir kunda bitta punktda 70 kishi emlanadi – shtab 

O‘zbekistonda ijtimoiy masofa saqlanishi va aholi to‘planishining oldini olish maqsadida bitta emlash punktida bir kunda emlanadiganlar soni 70 nafargacha etib belgilandi. Bu haqda Koronavirusga qarshi kurashish shtabi a'zosi Nurmat Otabekov AOKAda o‘tkazilgan brifingda ma'lum qildi.

Ma'lum qilinishicha, koronavirusga qarshi emlash tadbirlari, respublikaga ushbu vaksinalarning yetib kelish muddati bilan bog‘liq. Hozircha bu muddat fevral oyining oxiri va mart oyining boshlari bo‘lishi kutilmoqda.

«Vaksinalar miqdoridan kelib chiqib, aholining katta miqdorda to‘planib qolishiga yo‘l qo‘ymasdan, emlanishga kelgan aholi orasida ijtimoiy masofani saqlagan holda har bitta emlash punktida bir kunda emlanadigan aholi soni 70 nafargacha deb belgilanmoqda. Koronavirusga qarshi emlangan shaxslar, patronaj tibbiyot xodimlari tomonidan, emlangandan so‘ng 30 daqiqa davomida, keyinchalik 3 kun davomida uyiga tashrif buyurish yo‘li bilan muntazam surishtirib boriladi, ularning sog‘lig‘i ko‘zdan kechirilib, hujjat bilan rasmiylashtiriladi.

Markazdan va aholi yashash punktlaridan uzoqda joylashgan hududlar aholisini koronavirusga qarshi emlashni amalga oshirish maqsadida aholining borishi qulay, yaqin bo‘lgan oilaviy shifokor punkti filiallarida ham vaqtinchalik emlash punktlari tashkil qilinib, harakatdagi brigada-vrach, vaksinator va dublyorlardan iborat guruhlar faoliyati tashkil etilib, ular zarur avtotransport vositalari bilan taminlanadi», degan Nurmat Otabekov.

Koronavirusga qarshi emlash jarayonlari ommaviy axborot vositalari orqali bevosita yoritib boriladi.

• Bundan avvalroq O‘zbekistonda birinchi navbatda 4 milliondan ortiq kishi (keksa yoshdagilar, tibbiyot xodimlari, surunkali kasalliklari bor aholi, maktab o‘qituvchilari, maktabgacha ta'lim muassasasi xodimlari, qurolli kuchlar va huquqni muhofaza qiluvchi organlar xodimlari) bepul emlanishi xabar qilingandi.
• Bugun Respublika maxsus komissiyasi O‘zbekistonda «Sputnik V» vaksinasini qo‘llashga ruxsat berilgani, ushbu vaksinadan 1 million doza xarid qilish yuzasidan amaliy choralar ko‘rilayotgani, shuningdek, xitoyliklar vaksinasidan ham 1 million doza sotib olinishi haqida ma'lum qildi.