2020 yilda O‘zbekiston 2015 yil bilan taqqoslaganda global innovatsiya indeksi reytingda 29 pog‘onaga ko‘tarilib, 93-o‘rinni egalladi. O‘zbekiston Markaziy va Janubiy Osiyo mamlakatlari orasida 4-o‘rin va daromadi o‘rtachadan past bo‘lgan 29 mamlakat orasida 12-o‘rinni egallagan.
Global innovatsiya indeksi (The Global Innovation Index) global tadqiqot bo‘lib, u davlatlarning innovatsion rivojlanganlik darajasini baholaydi. Mazkur reytingni baholash uslubi Fransiyaning INSEAD xalqaro biznes-maktabi, Kornel universiteti va Butunjahon intellektual mulk tashkiloti (BIMT) tomonidan ishlab chiqilgan. Hozirda Global innovatsiya indeksi 80ta ko‘rsatkichlardan iborat bo‘lib ularning soni yildan yilga o‘zgarib turishi mumkin.
O‘zbekiston Global innovatsiya indeksida so‘nggi marotaba 2015 yilda 141ta davlat ichidan 122-o‘rinda, Rossiya – 48, Qozog‘iston – 82, Qirg‘iziston – 109, Tojikiston 114-o‘rinda bo‘lgan. 2020 yildan avvalgi 5 yil davomida mamlakat Global innovatsiya indeksidan umuman joy olmagan. O‘zbekistonning reytingda aks etmagani asosiy sabablari sifatida Global innovatsiya indeksi indikatorlari bo‘yicha ma'lumotlarning yetarli darajada emasligi va mavjud statistik ma'lumotlarning eskirgani ko‘rsatilgan.
Uzoq muddatli tanaffusdan so‘ng 2020 yilgi Global innovatsiya indeksi reytingida O‘zbekiston 43ta kirish indikatorlari va 22ta chiqish indikatorlariga ko‘ra baholanib, 131ta mamlakat ichida 93-o‘rinda yana qayta ro‘yxatga kiritildi. 2020 yilda Shveytsariya – 1, Shvetsiya – 2, AQSh – 3, Rossiya – 47, Qozog‘iston – 77, Qirg‘iziston – 94, Tojikiston – 109-o‘rinni egalladi.
O‘zbekiston 2020 yili Global innovatsiya indeksida quyidagi subindikatorlarda yuqori o‘ntalik davlatlar qatoriga kirdi:
- biznes boshlashning oddiyligi (Ease of starting a business) – 8-o‘rin;
- ilm-fan va texnika sohasida bitiruvchilar (Graduates in science&engineering) – 7-o‘rin;
- kapitalni yalpi ravishda jamlash (Gross capital formation) – 8-o‘rin.
2020 yilda 80ta ko‘rsatkichdan iborat bo‘lgan Global innovatsiya indeksi reytingida O‘zbekiston dunyo mamlakatlari ichida innovatsion resurslar, ya'ni kirish subindeksi bo‘yicha 81-o‘rinni, reyting ustunlari bo‘lmish institutsional rivojlanish (Institutions, 95-o‘rin), inson kapitali va ilmiy-tadqiqot faoliyati (Human capital & research, 77-o‘rin), infratuzilma (Infrastructure, 72 o‘rin), bilim va texnologiyalar natijadorligi (Knowledge & technology outputs, 90-o‘rin) kabi yo‘nalishlardagi indikatorlarda ijobiy natijalarga erishdi.
