Sud binolari qaytadan quriladi

Vazirlar Mahkamasining «2021-2025 yillarda sudlarning binolari va xonalarini qurish hamda rekonstruksiya qilish dasturini tasdiqlash to‘g‘risida»gi qarori qabul qilindi.

Norma’ning yozishicha, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari «Yagona buyurtmachi xizmati» injiniring kompaniyalari sudlar binolari va xonalarini qurish hamda rekonstruksiya qilish bo‘yicha buyurtmachi etib belgilandi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga hududlar bosh rejasi asosida dasturda yangidan qurilishi belgilangan obektlar uchun yer uchastkalari belgilangan tartibda ajratilishini ta'minlash topshirildi.

Oliy sudga Iqtisodiy taraqqiyot va kambag‘allikni qisqartirish vazirligi hamda Moliya vazirligi bilan kelishgan holda, zaruratga ko‘ra, dasturda nazarda tutilgan parametrlarga qo‘shimcha va o‘zgartirishlar kiritish huquqi berildi.

Respublika bo‘yicha jami 31ta obektni qurish va 107ta obektni rekonstruksiya qilish rejalashtirilgan. Qurilish markazlashtirilgan mablag‘lar hisobidan moliyalashtiriladi. Bunda 31ta obektning tashqi muhandislik tarmoqlari qurilishini moliyalashtirish mahalliy budjet mablag‘laridan amalga oshiriladi.