Suvaysh kanali ma'muriyati “Ever Given” bilan bog‘liq zararni 1 milliard dollarga baholadi  

Suvaysh kanalining “Ever Given” kemasi bilan to‘silishidan kanal ma'muriyati ko‘rgan zarar 1 mlrd dollarga yaqinni tashkil qiladi. Bu haqda kanal ma'muriyati rahbari Usoma Robi ma'lum qildi. 

Uning ta'kidlashicha, hodisa tergovi kamida bir hafta vaqt oladi. Tergov yakunlanmaguncha “Ever Given” kanalni tark etmaydi. 

“Biz ko‘rilgan zararni, voqeaning birinchi kunidan qo‘llangan vositalar, buksirlar va boshqa texnikaga sarflangan xarajatlarni hisob-kitob qilib chiqamiz, bu anchagina mablag‘ni tashkil qiladi”, deb aytgan Robi Sada el-Balad telekanali efirida. 

Uning aytishicha, dastlabki hisob-kitoblarga ko‘ra, ko‘rilgan zarar 1 mlrd dollarga yaqinni tashkil qiladi.   

Allianz sug‘urta kompaniyasi kanalning bir hafta davomida to‘silishidan jahon savdosi ko‘rgan zararni 6-10 mlrd dollarga baholagan. The Loadstar ma'lumotlariga ko‘ra, hodisa oqibatida kanal oldida turib qolgan kemalarning operatsion xarajatlari konteyner tashuvchi kemalar uchun kuniga 3,25 mln dollarni, tankerlar uchun 500 ming dollarni tashkil qilgan.  

Suvaysh kanali 23 mart kuni “Ever Given” kemasining sayozlikka o‘tirib qolishi oqibatida to‘sib qo‘yilgandi. 29 mart kuni kemani sayozlikdan olishga va kanalda harakatni tiklashga muvaffaq bo‘lingan. Ekspertlarning baholashicha, kanal bu vaqt ichida har kuni 12-14 mln dollar zarar ko‘rgan.