Chorvoqda o‘nlab davlat obektlari tadbirkorlarga sotilmoqda

Bo‘stonliq tumani «Chorvoq» erkin sayyohlik zonasida joylashgan, hozirgi kunda bo‘sh turgan yoki samarasiz foydalanilayotgan turistik obektlarga infotur tashkil etildi.

Unda tadbirkorlar va OAV vakillariga sotuvga qo‘yilgan obektlar haqida ma'lumot berildi.

Ushbu davlat aktivlari 2020 yil sentyabrdagi hukumat qaroriga asosan sotilishi belgilangan.

{Yii::t(}

O'tkazib yuborish 6s

O'tkazib yuborish

Infotur doirasida 12ta dam olish maskani – «Ekonomist» dam olish zonasi, «Chotqol» sanatoriysi bino va inshootlari, sobiq tayanch punkti va unga tutash hudud, «Lingvistlar» sport-sog‘lomlashtirish oromgohi, «Soylik» dam olish zonasi, «Institut» rangli lager metallar, «Gidroenergetik» sport-sog‘lomlashtirish oromgohi, Tibbiyot akademiyasining sobiq qarorgohi, «Zumrad servis» MChJ, G‘azalkent Suvoqova bino-inshootlari va yer uchastkalari, «Geoburtexnika» DATK dam olish maskani bilan tanishtirildi.

Har xil o‘lchamdagi foydalanilmayotgan eski binolar, Chorvoq suv ombori bo‘ylab, tog‘li hududlarda, qirg‘oqdan unchalik uzoq bo‘lmagan joyda joylashgan.

Bu obektlarni mehmonxonalarga aylantirib, Chorvoqning turistik salohiyatini yaxshilash ko‘zda tutilgan. Qayd etilishicha, hudud infratuzilmasini yaxshilash: ichimlik va oqova suv ta'minoti, yo‘llar holati, energotizimlar va chiqindilar bilan bog‘liq muammolarni hal etish choralari ham ko‘riladi.

«Chorvoq» erkin turistik zonasi direktor o‘rinbosari Otabek Bobomurodov infotur ishtirokchilariga ma'lumot berdi.

«Bo‘stonliq tumanidan auksion savdolariga 18ta obektni qo‘yganmiz, bular aniq shartlar asosida ishlab chiqilgan. Ya'ni bu yerni sotib olgan tadbirkor o‘sha shart va majburiyatlarga rioya qiladi, o‘zboshimchalik bilan boshqacha faoliyat yuritishga, masalan dacha qurib olish kabi, yo‘l qo‘yilmaydi.

Savdolar «Xususiylashtirish to‘g‘risida»gi qonun va qonunosti hujjatlari doirasida amalga oshiriladi. Mulk daxlsizligi ta'minlanadi. Qolaversa, yuqorida ta'kidlaganimdek, tadbirkorga majburiyatlar ham yuklanadi, boshqa hududlarni egallab olish, ekologiyaga zarar yetkazadigan tarzda faoliyat yuritish mumkin bo‘lmaydi.

Bundan tashqari, tadbirkorlar o‘z loyihalarini «Chorvoq» erkin sayyohlik zonasi bilan kelishgan holda amalga oshiradi. Chunki aynan mana shu hudud geografik landshafti va tabiatiga mos bino qurish tavsiya etiladi», – dedi turistik zona direktor o‘rinbosari.

Otabek Bobomurodovning so‘zlariga ko‘ra, auksionga qo‘yilgan obektlar holati talab darajasida emas, ular balansda saqlovchilar tomonidan sifatli ekspluatatsiya qilinmagan.

«Biz auksionga qo‘ygan obektlar xarob ahvolda, yetarlicha qaralmagan, e'tibor berilmagan, vaholanki, ular eng jozibador hududda joylashgan», – deydi u.