18:55 / 01.06.2021
35919
Лукашенко Путин билан учрашувга олиб борган чемоданида нима бўлганини айтди

Беларусь президенти Александр Лукашенко россиялик ҳамкасби Владимир Путин билан учрашувга қора чемодан билан боргани кўпчиликнинг эътиборини тортганди. Беларусь президенти бу «сирли» чемоданда нима бўлгани ҳақида гапирди.

Фото: kremlin.ru

«Бу чемодан ичида бўлган маълумотларни эълон қилиб бўлмасди, чунки улар янги можароларни келтириб чиқарарди. Чемоданда Россия ва Беларусга алоқадор таҳлилий материаллар бор эди. Икки иттифоқчи мамлакатнинг ғарбий векторида содир бўлаётган воқеалар таҳлилига бағишланган бу материаллар бизнинг махсус хизматлар томонидан тайёрланган. Мен уларни Путин билан бўлишишга қарор қилдим.

Бундай маълумотлар алмашинуви бизда Путин билан анчадан буён шаклланган. Бир куни унинг кабинетига кирганимизда менга катта папкани берди ва «Ўқиб чиқ, сен учун фойдали», деб айтди. У ерда Беларуснинг Ғарб билан алоқалари ва бошқа масалаларда гаплар бор эди. Биз ҳам жавоб ўлароқ бир неча йил олдин шундай таҳлиллар тайёрлай бошладик. Бу гапларни билиб қўйишингиз учун айтяпман, у ерда ҳеч қандай самолёт, унинг ичида қўлга олинган террорчилар ҳақида маълумотлар йўқ эди», деган Лукашенко ҳукумат йиғилишида.

23 май куни Беларусда машҳур Nexta Telegram-канали собиқ бош муҳаррири Роман Протасевич Афинадан Литвага учаётганда, у ичида бўлган Ирландиянинг Ryanair самолёти қирувчи самолёт ёрдамида қўнишга мажбур қилинганди. Лукашенко бу воқеадан кўп ўтмай, 28 май куни Россия президенти Владимир Путин билан Сочида учрашди. Беларусь президенти бир кун олдин Путин билан икки мамлакат иқтисодий ривожланиши ҳақида гаплашишини айтган, бироқ Путин билан учрашувнинг очиқ қисмидаёқ бир неча марта самолёт қўлга олиниши ҳақида гапирганди.

Лукашенко Путин билан учрашувга чемодан билан борганида кўпчилик унинг ичида Ryanair самолётини қўндириш билан боғлиқ ҳужжатлар бор деб ўйлай бошлади. Чунки Лукашенко Путин билан учрашувнинг очиқ қисмида самолёт қўлга олиниши билан боғлиқ ҳолат ҳақида гапирар экан ҳамкасбига баъзи ҳужжатларни кўрсатиши ва уни кўргач, ҳолат ҳақида янада тўлиқроқ тасаввурга эга бўлишини айтганди.

Top