Pokistonning sobiq prezidenti Mamnun Husayn 80 yoshida Karachida hayotdan ko‘z yumdi. Buni uning o‘g‘li Arslon Mamnun tasdiqladi.
Uning ta'kidlashicha, otasi saraton kasalligidan aziyat chekkan va oxirgi 2 hafta davomida xususiy shifoxonada davolangan.
Mamlakatning amaldagi prezidenti Orif Alviy, hukumat yetakchilari va boshqa siyosatchilar Husayn oilasiga o‘z hamdardligini bildirgan.
Husayn 1940 yil dekabrda Hindistonning Agra shahrida dunyoga kelgan. U Pokistonning 12-prezidenti bo‘lgan va ushbu lavozimni 2013 yildan 2018 yilgacha egallagan. Bungacha u Sind viloyati gubernatori sifatida faoliyat yuritgan.
Husayn mamlakatning sobiq bosh vaziri, bir necha yil avval Pokistonda ikkita ish bo‘yicha sudlangan va hozirda Britaniyada qolayotgan Navoz Sharifning yaqin safdoshi bo‘lgan.