Rayhona Qodirova chorakfinalga chiqdi, Oltiboyev bronza yo‘lida muvaffaqiyatsizlikka uchradi

-60 kg vazn toifasida O‘zbekiston sharafini himoya qilayotgan Rayhona Qodirova Tokio-2020 Olimpiya o‘yinlaridagi dastlabki jangini o‘tkazdi. 

U dastlabki jangida Kongo DR vakili Yumba Naomiyega qarshi ringga chiqdi va jang davomida to‘liq ustunlikka erishib, yakunda hakamlar bahosiga ko‘ra 5:0 hisobidagi g‘alabaga erishdi.

Endi Qodirova 3 avgust kuni yarimfinalga chiqish uchun amaldagi jahon chempioni braziliyalik Beatriz Ferreyraga qarshi ringga ko‘tariladi.

Tokio-2020 Olimpiya o‘yinlarining yakkalik bellashuvlari dzyudochilar jamoasi uchun yakunlandi.

Bugun eng og‘ir vazn toifasida ishtirok etgan Bekmurod Oltiboyev dastlabki janglarda mo‘g‘ulistonlik Durenbayar Ulzibayar va niderlandiyalik Henk Grolni mag‘lub etgandi. Ammo chorakfinalda Rio-2016 Olimpiadasi chempioni, chexiyalik Lukash Krpalekka mag‘lub bo‘ldi.

Bronza medali uchun o‘tish bahsida esa ukrainalik Yakiv Xamnoga qarshi bellashuvda ham Oltiboyev vazari bahosi bilan imkoniyatni boy berib qo‘ydi. Shu tariqa u yakkalik bahslarini yettinchi o‘rinda yakunladi.

Ertaga aralash jamoaviy yo‘nalishda o‘zbekistonlik dzyudochilar o‘z ishtiroklarini davom ettirishadi. Ilk raqib Niderlandiya jamoasi bo‘ladi.