Tokio-2020. Bekzod Abdurahmonov O‘zbekistonga yana bir medal taqdim etdi

Tokio Olimpiadasida O‘zbekiston sharafini -74 kg vazn toifasida himoya qilgan Bekzod Abdurahmonov bronza medaliga sazovor bo‘ldi.

6 avgust kuni tongda Bekzod Abdurahmonov bronza medali uchun o‘tish bahsida Gvineya-Bissau vakili Augusto Midanani taslim etgandi.

Medal uchun bahsda unga 2019 yilgi jahon chempionati sovrindori Daniyar Kaysanov raqiblik qildi. Bellashuv davomida tezkor harakatlari va abjirligi bilan ajralib turgan Abdurahmonov 2 daqiqa 13 soniyada bahs taqdirini hal qildi - bu vaqtga kelib hisob 13:2 ko‘rinishini olgach, kurash to‘xtatildi (qoidaga ko‘ra ochkolardagi farq 10 ochkoga yetsa g‘olib aniq bo‘ladi).

Shu tariqa Abdurahmonov delegatsiya hisobiga yana bir medalni qo‘shib qo‘ydi. 

Bu O‘zbekiston delegatsiyasi uchun Tokio Olimpiadasidagi to‘rtinchi medal bo‘ldi. Bungacha taekvondochi Ulug‘bek Rashidov oltin, dzyudochi Davlat Bobonov bronza, og‘ir atletikachi Akbar Jo‘rayev oltin medalga ega chiqqandi. Endilikda O‘zbekiston umumiy reytingda 32-o‘rinni egallab turibdi.

• Eslatib o‘tamiz, Bekzod Abdurahmonov 5 avgust kungi dasturda 1/8 finalda Puerto-Riko vakili Franklin Gomesni 10:0 hisobida yengib, chorakfinalga chiqqandi. Biroq 1/4 finalda rossiyalik ikki karra jahon chempioni Zaur Sidakovdan yengildi. Sidakov finalga chiqqani evaziga Abdurahmonovda bronza medali uchun kurashish imkoniyati saqlanib qolgandi.
• Ma'lumot uchun, jahon chempionatlarining ikki karra sovrindori, Osiyo o‘yinlarining ikki karra chempioni hisoblangan Abdurahmonov 5 yil muqaddam Rio-2016 Olimpiadasida bronza uchun kurashda imkoniyatni boy berib qo‘ygan edi.