Moskvada migrantlarni tekshirish bo‘yicha ikkita reyd o‘tkaziladi

Moskva shahri va Moskva viloyatida politsiya xodimlari «GIBDD» va «Rosgvardiya» bilan birgalikda migrantlarni tekshirish bo‘yicha ikkita reyd o‘tkazadi, deb xabar bermoqda Pravda.ru.

14 avgustdan boshlab Moskvadagi taksi xizmatlarida ishlayotgan mehnat muhojirlari «ART» tizimi nazorati ostida faoliyat ko‘rsatadi. Taksi haydovchilarining raqamli identifikatorlari ishga tushishidan oldin «GIBDD» xodimlari kuchaytirilgan tekshiruv o‘tkazadi. 

Bu reyd davomida «Aqlli shahar» texnologiyalaridan foydalaniladi. Huquqni muhofaza qilish organlari xodimlarining asosiy vazifasi - «ART» tizimida ro‘yxatdan o‘tmagan haydovchilarni topish va ularga nisbatan qonuniy jazo choralarini qo‘llash.

Moskvada migrantlar ustidan nazoratning kuchaytirilishiga yaqinda shahar janubi-sharqida sodir bo‘lgan voqea sabab bo‘ldi. Qirg‘iziston, Tojikiston va O‘zbekistonning yuzga yaqin fuqarolari ishtirokidagi ommaviy mushtlashuv ko‘plab shaxslarning hibsga olinishi va deportatsiya qilinishiga olib keldi.

Shu munosabat bilan, «GIBDD»dan tashqari, politsiya xodimlari ham muddatsiz reydlar o‘tkazadi. Xodimlar mehnat muhojirlarining ommaviy yashash joylariga borishni rejalashtirmoqda. Shuningdek, «Rosgvardiya» tekshiruvlar chog‘ida tartibni saqlash ustidan nazoratni amalga oshirishi ma'lum qilindi. 

Eslatib o‘tamiz, Rossiya ichki ishlar vazirining birinchi o‘rinbosari Aleksandr Gorovoy MDH mamlakatlari elchilari bilan videokonferensiya o‘tkazdi. Uchrashuv ishtirokchilari chet el fuqarolari ishtirokidagi nizolar va noqonuniy migratsiya muammolarini muhokama qilishdi.

Gorovoyning so‘zlariga ko‘ra, Rossiyada hozirgi vaqtda MDH davlatlaridan kelgan 700 mingdan ortiq kishi noqonuniy yashaydi. Shu bilan birga, noqonuniy migrantlar muntazam ravishda ma'muriy va jinoiy ishlar figurantiga aylanadi hamda bu yil ularning noqonuniy harakatlari soni ko‘paygan.