Germaniya O‘zbekiston va Tojikistonga vaksina yetkazib beradi

O‘zbekiston va Tojikistonga Germaniya tomonidan koronavirusga qarshi AstraZeneca vaksinasi yetkazib beriladi. Bu Germaniyaning rivojlanayotgan mamlakatlarga va'da qilingan yordamining bir qismi sifatida SOVAX dasturi doirasida taqdim qilinadi.

Bu haqda Germaniya rasmiy vakilining o‘rinbosari Ulrike Demmer ma'lum qilgan.

Uning so‘zlariga ko‘ra, mos ravishda Toshkent va Dushanbega 355 ming 200 va 100 ming 800 doza vaksinalar ajratiladi.

Bundan tashqari, Sudan (357 ming 600 doza), Efiopiya (271 mig 200 doza) va Afg‘onistonga (213 ming 600 doza) ham vaksinalar ajratilishi ko‘zda tutilgan.

21 may kuni Rimda bo‘lib o‘tgan Global sog‘liqni saqlash masalalariga bag‘ishlangan sammitida Germaniyaning SOVAX dasturi doirasida yil oxirigacha 30 million doza vaksinani rivojlanayotgan mamlakatlarga yetkazib berishi haqida qaror qabul qilingandi.

SOVAX - Jahon sog‘liqni saqlash tashkiloti tomonidan emlash va immunlashtirish bo‘yicha global alyans va epidemiyaga tayyorgarlik bo‘yicha innovatsiyalar koalitsiyasi bilan hamkorlikda ishlab chiqarilgan xalqaro tizim. Dastur shartlariga ko‘ra, yuqori daromadli mamlakatlar kam ta'minlangan mamlakatlarga vaksinalar sotib olish uchun pul to‘laydi. Rejalarga ko‘ra, mexanizm doirasida 2021 yil oxirigacha 2 milliard dozada vaksina ishlab chiqarilishi va butun dunyo bo‘ylab teng taqsimlanishi kerak.

Avvalroq, O‘zbekistonga keltirilgan jami vaksinalar 14 million 580 ming 60 dozani tashkil qilayotgani ma'lum qilingandi.