AQSh, Britaniya va Kanada Afg‘onistonga minglab askar jo‘natmoqda

Pentagon matbuot kotibi Jon Kirbining ta'kidlashicha, AQShning Kobuldagi elchixonasi xodimlarini xavfsiz evakuatsiya qilish uchun Afg‘onistonga yaqin 48 soat ichida 3 ta batalon, ya'ni 3 mingga yaqin harbiy jo‘natiladi. Uning ta'kidlashicha, harbiylar Afg‘onistonda vaqtinchalik asosda joylashtiriladi. Amerikalik fuqarolarni Afg‘onistondan olib chiqish 31 avgustgacha yakunlanadi. Pentagon vakili ushbu sanadan keyin Afg‘onistonda qancha harbiy qolishi haqidagi savolga javob berolmagan.

Shuningdek, Kanada o‘z elchixonasi xodimlarini evakuatsiya qilish vaqtida va u yopilgungacha xavfsizlikni ta'minlash uchun Kobulga maxsus kuchlar bo‘linmasini jo‘natadi. Biroq Afg‘onistonga yuboriladigan kanadalik harbiylar soniga aniqlik kiritilmagan.

Bundan tashqari, London ham shu maqsadda Afg‘onistonga 600 ga yaqin harbiy jo‘natadi. 

AQSh davlat departamentining ma'lum qilishicha, AQSh davlat kotibi Entoni Blinken va mudofaa vaziri Lloyd Ostin Afg‘oniston prezidenti Ashraf G‘ani bilan suhbatda Vashington Afg‘oniston hukumatiga ko‘mak ko‘rsatishni davom ettirishiga va'da bergan.

Blinken AQSh afg‘on ixtilofining siyosiy yo‘l bilan hal qilinishini qo‘llab-quvvatlashini aytgan.

Bu orada Pokiston bosh vaziri Imron Xonning ma'lum qilishicha, “Tolibon” harakati Ashraf G‘ani hokimiyatdan ketmaguncha, Afg‘oniston hukumati bilan muzokaralar olib bormaydi.

“Ularning sharti shunday: Afg‘oniston prezidenti Ashraf G‘ani egallab turgan lavozimida qolar ekan, biz afg‘on hukumati bilan muloqot olib bormaymiz”, deb keltirgan “Tolibon” yetakchilari so‘zlarini Xon.

Pokiston bosh vazirining ta'kidlashicha, ayni vaqtda ixtilofni siyosiy yo‘l bilan hal qilish o‘ta murakkab.

OAV ma'lumotlariga ko‘ra, “Tolibon” o‘z yurishini davom ettirmoqda. 12 avgustda toliblar Afg‘onistonning yirikligi bo‘yicha ikkinchi shahri – Qandahorni egallab olgani ma'lum qilingan.