Jarohat sababli maydonga tusha olmayotgan 7 yulduz. Ular qachon safga qaytishadi?

Yevropada kuchli beshlik chempionatlari start olgan bo‘lsa-da, bir qator klublarning yetakchilari jarohat sababli hali hamon maydonga qayta olishmayapti. Tribuna.uz quyida top-klublarning jarohat olgan yulduz futbolchilari qachon safga qaytishi mumkinligi haqida ma'lumot beradi.

Zlatan Ibrahimovich

Jarohat: o‘ng oyoq tovoni shikastlanishi

Safga qaytish muddati: sentabr

«Milan» klubi hujumchisi Zlatan Ibrahimovich A Seriya yangi mavsumi dastlabki turlarida jamoasiga yordam bera olmaydi. 39 yoshli shvetsiyalik hujumchi haligacha «Milan»ning jamoaviy mashg‘ulotlariga qo‘shilmagan va yakka tartibda tayyorgarlik ko‘rmoqda.

Gazetta della Sport’ning yozishicha, murabbiylar shvetsiyalik goleadorning ertaroq safga qaytishiga umid qilishgan, ammo 39 yoshli forvard haligacha to‘liq tiklanib ulgurmagan.

Shu tariqa, Ibrahimovich A Seriya 1-turi doirasidagi «Sampdoriya» va 2-turdagi «Kalyari»ga qarshi bahsni o‘tkazib yuborishi deyarli aniq.

Zlatan A Seriya yakunlangan mavsumining 9 may kuni o‘tgan «Yuventus»ga qarshi bahsda jarohat olib, iyun oyida Yevro-2020ga bora olmay, jarrohlik stoliga yotgan edi.

Toni Kroos

Jarohat: qorin osti qismi

Safga qaytish muddati: noma'lum

«Real» yarimhimoyachisi Toni Kroos 3 avgust kuni jarohat olib safdan chiqdi. Klub rasmiy sayti xabariga ko‘ra, futbolchi qorin osti qismida og‘riq sezmoqda. Klub shifokorlari futbolchining qachon safga qaytishini ma'lum qilmagan.

Germaniyalik yarimhimoyachi La Liga 1-turi doirasidagi «Alaves»ga qarshi o‘yinni (4:1) ham o‘tkazib yubordi. 31 yoshli nemis futbolchisi Yevro-2020dan keyin milliy jamoadagi faoliyatini yakunlaganini e'lon qilgandi.

Serxio Aguero

Jarohat: oyoq mushaklari shikastlanishi

Safga qaytish muddati: oktabr

«Manchester Siti»dan erkin agent sifatida «Barselona»ga o‘tgan Serxio Agueroning jarohati kutilganidan ham jiddiyroq bo‘lib chiqdi. Diario Sport xabariga ko‘ra, 33 yoshli argentinalik hujumchi oyoq mushaklaridagi shikastlanish sababli 10 haftagacha maydonga tusha olmaydi. Futbolchining yangi klubidagi debyuti oktabr oyiga qadar cho‘zilishi taxmin qilingan.

Shu tariqa, argentinalik forvard «Real Sosedad» bilan o‘tgan o‘yin bilan birga «Atletik» (22 avgust), «Xetafe» (29 avgust), «Sevilya» (12 sentabr), «Granada» (19 sentabr), «Kadis» (22 sentabr) va «Levante» (26 sentabr) bilan bahslarni o‘tkazib yuborishi kutilmoqda. Aguero klubdagi debyutini 3 oktabr kuni sobiq klubi «Atletiko» bilan bahsda nishonlashi mumkin.

Markus Reshford

Jarohat: yelka jarrohlik amaliyoti

Safga qaytish muddati: oktabr

«Manchester Yunayted» hujumchisi Markus Reshford avgust oyi boshida yelkasidan jarrohlik amaliyotini o‘tkazdi. The Telegraph xabariga ko‘ra, angliyalik forvard endi 12 haftagacha maydonga tusha olmaydi. Yevro-2020dan keyin yozgi ta'tilni o‘tkazgan Markus noyabr oyidan buyon qiynab kelayotgan jarohatini davolashga qaror qilgan.

Reshford 2020 yilning 1 noyabr kunida «Arsenal» bilan bahsda yelkasidan jarohat olib, shu kungacha og‘riq qoldiruvchi ukol bilan o‘ynab kelayotgandi.

Shu tariqa, Reshford 3 oy davomida APL doirasidagi 9 o‘yinda, shu jumladan «Lester» va «Liverpul» bilan bahsni, shuningdek YeChL doirasidagi 3ta o‘yinni o‘tkazib yuborishi kutilmoqda.

Fil Foden

Jarohat: tizza bo‘g‘imlari shikastlanishi

Safga qaytish muddati: sentabr

«Manchester Siti» va Angliya milliy jamoasi yarimhimoyachisi Fil Foden avgust oyi boshida jarohat sababli bir oyga safdan chiqdi. 21 yoshli yarimhimoyachi milliy jamoadagi mashg‘ulotlarda olgan eski jarohatini qo‘zg‘atgan. Natijada Foden «Manchester Siti»ning mavsum oldi mashg‘ulotlarini tark etib, kamida bir oy davomida tiklanish jarayonini o‘tkazadi. Fil APL 1-turi doirasidagi «Tottenhem» bilan bahsda ham jamoasiga yordam bera olmadi. Shu tariqa, u «Norvich» (21 avgust) va «Arsenal» (28 avgust) bilan bahslarda «Manchester Siti»ga yordam bera olmaydi.

Shuningdek, u Angliya milliy jamoasining JCh-2022 saralash bosqichi doirasidagi Vengriya (2 sentabr), Andorra (5 sentabr) va Polsha (8 sentabr) bilan o‘yinlarini o‘tkazib yuboradi.

Endryu Roberson

Jarohat: o‘ng oyoq tovoni shikastlanishi

Safga qaytish muddati: sentabr

«Liverpul» himoyachisi Endryu Roberson mavsum oldidan «Atletik»ga qarshi kechgan o‘rtoqlik o‘yinida jarohat olib safdan chiqqandi. Shotlandiyalik futbolchi tanaffusga yaqin o‘ng oyoq tovonini qayirib olgandi.

«Bu juda og‘riqli bo‘lgani ko‘rinib turgandi. Roberson qachon qaytishini aniq bilmayman. Umid qilamanki, u sentabr oyidan bizga yordam bera oladi», - deya bosh murabbiy Yurgen Kloppning so‘zlarini keltirgan Goal.com.

APL 1-turi doirasida «Norvich» bilan o‘yinni o‘tkazib yuborgan shotlandiyalik chap qanot himoyachisi «Bernli» (21 avgust), «Chelsi» (28 avgust) va Shotlandiya milliy jamoasining JCh-2022 saralash bosqichidagi o‘yinlarini ham o‘tkazib yuboradi.

Serxio Ramos

Jarohat: chap oyoq suyagi shikastlanishi

Safga qaytish muddati: sentabr

Madridning «Real» klubidan erkin agent sifatida «PSJ» safiga kelib qo‘shilgan Serxio Ramos parijliklar safida haligacha debyutini o‘tkazgani yo‘q. 35 yoshli himoyachi jarohati sababli maydonga tusha olmayapti. Ramosni o‘tgan mavsumdagi jarohati – chap oyoq suyagidagi shikastlanish haligacha bezovta qilmoqda. Hozirda yakka tartibda tiklanish jarayonini o‘tkazayotgan ispaniyalik himoyachi sentabr oyi o‘rtalarida Fransiya chempionatidagi debyutini o‘tkazishi kutilmoqda.