«Bunaqasi Afg‘onistonda ham yo‘q» - Iqtisodchi Zafarobod-Forish yo‘li misolida sohada qilinishi kerak bo‘lgan ishlarni sanadi

Iqtisodchi Otabek Bakirov o‘z telegram kanalida  me'yordan ortiq yuk bilan harakatlanayotgan yuk mashinalari avtomobil yo‘llarining sifatiga jiddiy ziyon yetkazayotganiga to‘xtalib o‘tdi.

«Bayram kunlari Jizzax viloyatining Zafarobod tumanidan Forish tumaniga qarab yengil avtomashinada harakatlanishga to‘g‘ri keldi.

Albatta, sizga lof tuyulishi mumkin, lekin Zafarobodni Forish bilan bog‘laydigan yo‘l 40 yildan buyon urush ketayotgan Afg‘onistonda ham yo‘q. Suriyada ham yo‘q. Ishoning.

Bu yo‘ldan viloyat hokimi Ergash Soliyev yurmagani aniq. Zafarobod tuman hokimining yo‘li tushmagandir. Tashriflar doirasida bu joylardan aylanib o‘tadigan marshrut tuzishadi. Chunki mabodo davlat rahbari bu yo‘lga kortejni burib yuborsa, juda ko‘pchilik chinovniklarining kallasi ham, sallasi ham ketib qolishi turgan gap.

Nega Zafarobod—Forish yo‘li bunchalar abgor deysizmi? Bunga asosan Jizzax sement zavodidan sement tashiydigan yuk avtotransportlari sababchi. Tasnifi bo‘yicha 10 tonnali yukdan ortig‘i yo‘lni buzishi aniq bo‘laturib bu yo‘ldan 40, 50, 60 tonna yuk ortgan avtotransportlar qatnaydi. Tabiiyki, asfalt va tosh qoplamasi 30, 50 sm va hatto 1 metrgacha cho‘kib ketgan. Butun yo‘l vertikal va gorizontal garmoshkaga aylangan.

Lekin yo‘lda yuk me'yori bo‘yicha na ogohlantirishlar va na maxsus tarozilar bor», deydi iqtisodchi.

U  tarozi bilan ta'minlangan va me'yordan ortiqcha yuk yuklagan avtotransportlardan qo‘shimcha to‘lov undiriladigan yo‘llar sanoqli ekanini qayd etib, bir tarafdan yo‘l quraverish va bir muddat o‘tib yaroqsiz yo‘llarga kelib qolmaslik uchun qilinishi zarur bo‘lgan uchta ishni sanadi:

Birinchisi, yo‘llarda (avvalo yangi ta'mirlangan yo‘llarda) harakatdagi avtotransportlarning yuk me'yori cheklanganligini ko‘rsatuvchi yo‘l belgilarini o‘rnatish;

Ikkinchisi, yo‘llarda maxsus yuk tarozilarini o‘rnatish va ular faoliyatini inson omilini minimallashtirgan holda yo‘lga qo‘yish.

Uchinchisi esa me'yordan ortiq yuk bilan harakatlanayotgan yuk avtotransportlari uchun jarima choralarini (agar yo‘q bo‘lsa) qat'iylashtirish.