Sulsher Ronaldudan qanday foydalanadi?

Krishtianu Ronaldu 4445 kunlik safaridan so‘ng, «Manchester Yunayted»ga qaytdi. U «Old Trafford»ni tark etayotganidayoq megayulduz edi. Endi u Manchesterga afsona sifatida qaytdi. Krishtianu darajasidagi futbolchi hech bir klubga zaxirada o‘tirish uchun o‘tmaydi. Demak, Sulsher sobiq jamoadoshini tarkibga joylashtirish yo‘llarini qidirishi kerak. Quyida portugaliyalik 36 yoshli futbolchidan qaysi pozitsiyalarda foydalanish mumkinligi haqida fikr yuritiladi.

Olening klassik uslubi

Norvegiyalik murabbiy o‘z o‘yin uslubiga ega va taktik sxemasini (4-2-3-1) o‘zgartirishga muhtoj emas. Sababi, uning rejasidan markaziy hujumchi o‘rin olgan. Ronaldu bu vazifani ortig‘i bilan bajara oladi. Sababi, u faqat 9-raqamli taran hujumchi sifatidagina emas, jamoa hujumiga har taraflama yordam bera oluvchi lider futbolchi rolida o‘ynay oladi. Bu jamoaga tom ma'noda ijobiy impuls berishi aniq.

O‘tgan mavsum davomida Sulsher o‘ng qanotda Grinvud, chap qanotda Reshfordni o‘ynatdi va markazni Kavaniga topshirdi. Bu gal ham qanotlarni Meyson va Markusga berishi mumkin, lekin markazni Ronalduga berishi kutilyapti. Shuningdek, endi klubda Jyeydon Sancho ham bor. Grinvud ushbu mavsum avvalida ko‘proq hujum markazida o‘ynayotganiga e'tibor qaratadigan bo‘lsak, Sancho o‘ng qanotda asosiy futbolchiga aylanishi mumkin.

Kreativ pleymeyker rolida, shubhasiz, Brunu Fernandesh o‘ynaydi. U endi o‘z vazifasini to‘liq bajarishi va asosan hujumlar tashkil etish bilan shug‘ullanishi mumkin. «Manchester Yunayted»dagi hozirgacha bo‘lgan vaqti mobaynida portugaliyalik yarimhimoyachi ko‘plab gollarda muallif bo‘layotgandi. Endi goleadorlik roli Krishtianuga o‘tadi. Mudofaa va hujumni bog‘lashda Fred – Pogba tandemi ishlashini taxmin qilish mumkin. Grandlarga qarshi o‘yinlarda himoyani ham mustahkamlash uchun Sulsher Pogbani Skott MakTomineyga almashtirish imkoniyatiga ega bo‘ladi. Buni murabbiy vaziyatdan kelib chiqib hal qila oladi. Himoyadagi to‘rtlik: Shou, Maguayr, Varan, Uan-Bissakka bo‘lishi katta ehtimol. Lindelyof mudofaa markazida ba'zi o‘yinlarda jamoadoshlarini almashtirib turishi mumkin. Dalot va Tellesning yuqori sport formasida emasligini inobatga olsak, qanot himoyasidagi juftlik deyarli o‘zgarmas.

De Xea hozircha mavsumni yaxshi boshladi va Din Henderson zaxirada imkoniyatini kutib turadi.

Santush tajribasi

Ronaldudan unumli foydalanish maqsadida Ole taktik sxemani o‘zgartirishi ham mumkin. Portugaliyada Fernandu Santush 4-3-3 sxemasidan foydalanadi. Lekin bu holat jamoaning boshqa bir yetakchisi Brunu Fernandesh uchun noqulaylik tug‘dirishi mumkin. Sababi, milliy jamoada ko‘p marotaba Brununing zaxirada qolishiga guvoh bo‘lamiz va bu murabbiy sxemasiga futbolchining mos kelmasligi bilan izohlanadi. Bugungi «MYu»ni esa Fernandeshsiz tasavvur qilish qiyin.

Xo‘sh, Santush Yevro-2016da g‘alabaga erishgan, Irlandiya va Ozarboyjonga qarshi uchrashuvlarda foydalangan 4-3-3 taktikasida «qizil iblislar» tarkibi qanday ko‘rinish oladi? Bu holatda katta ehtimol bilan Sancho chap qanotni egallaydi. «Vulverhempton»ga qarshi o‘yinda (1:0) ham xuddi shu pozitsiyada harakatlandi. Chapaqay Grinvud esa o‘ng qanot vingeri sifatida o‘ynashi mumkin. Bunday vaziyatda Fernandesh klassik 8-raqam pozitsiyasiga joylashishiga to‘g‘ri keladi. Markazda mehnatkash va to‘p olib qo‘yish ishlarida faol bo‘lgan Fredni ko‘rishimiz mumkin. Donni van de Bek esa an'anaviy 6-raqamli futbolchi: hujum va himoyani bog‘lovchi, texnikasi yuqori o‘yinchi rolida harakatlanish imkoniyatiga ega. Ushbu pozitsiyada o‘ynay olishi haqida futbolchining o‘zi ham bir necha intervyularida aytib o‘tgan. Mudofaa va darvoza chizig‘i bundan avvalgi sxemadagidek qoldiriladi.

Revolyutsion

Antonio Konte «Chelsi»da ishlagan kezlarida Angliya futboli uchun deyarli noma'lum bo‘lgan 3-5-2 taktikasini olib kirdi va debyut mavsumidayoq chempionga aylandi. O‘tgan mavsum Chempionlar Ligasi doirasidagi «Park de Prens»da o‘tgan «PSJ»ga qarshi bellashuvda Sulsher o‘zi odatlanib qolgan 4-2-3-1 taktikasidan chekinib, 3 markaziy himoyachi bilan harakatlangandi. Bu qarorga Maguayrning jarohat olgani sabab bo‘lgani ham bor gap. Lekin yangi taktik sxema «qizil iblislar»ning Parijdan g‘alaba bilan qaytishini ta'minlab berdi. Lekin Sulsher bundan keyin hech qachon uch markaziy himoyachi bilan o‘ynamadi.

Bu holatda tarkibdagi eng katta o‘zgarish Uan-Bisakka bilan sodir bo‘ladi va futbolchi asosiy tarkibdan tushib qolishi mumkin. Aaron hujumkor harakatlarda u qadar foydali emas. Uning o‘rni Dalot bilan to‘ldirilishi mumkin. Lekin bunday qaror qabul qilinishining ehtimoli juda past. Lekin endi Uan-Bisakka lateral qanot himoyachisi ko‘nikmalarini o‘zlashtirishi kerak. Chunki u endi jarima maydoniga uzatmalar amalga oshirishi va Ronalduni to‘p bilan ta'minlab turishi kerak. Krishtianuning ikkinchi qavatdagi ustunligidan foydalanish «Manchester Yunayted»ning natijalarini ijobiy tarafga keskin o‘zgartirishi mumkin.

Eslatib o‘tamiz, Krishtianu Ronaldu 11 sentabr kuni Angliya Premer-ligasi 4-turidan o‘rin olgan «Nyukasl»ga qarshi bellashuvda «qizil iblislar» tarkibida ikkinchi marta debyut qilishi kutilmoqda.

«Squawka.com» saytidan Abdulvosid Valixonov tarjimasi.