Ekspert: O‘zbekiston prezidenti saylovi mamlakatdagi islohotlar referendumiga aylanadi

O‘zbekiston prezidenti saylovi hozirgi davlat rahbari Shavkat Mirziyoyev tomonidan amalga oshirilayotgan islohotlar referendumiga aylanadi. Sankt-Peterburg davlat universiteti Xalqaro munosabatlar fakulteti professori Stanislav Tkachenko shunday fikr bildirdi.

«Oktyabr oyida bo‘lib o‘tadigan prezident saylovlari O‘zbekistonda olib borilayotgan islohotlarning o‘ziga xos referendumiga aylanishi ko‘rinib turibdi. Chunki islohotlarning ko‘lami nihoyatda katta», dedi Rossiya Federatsiyasi va xorijiy davlatlar diplomatiyasi magistrlik dasturi rahbari Toshkentdagi konferensiyada.

20 sentyabr kuni Toshkent shahrida «Valday» muhokamalar klubining “O‘zaro munosabatlarning yangi tarixiy bosqichida rivojlanish va xavfsizlik muammolari oldida turgan Rossiya va O‘zbekiston” deb nomlangan konferensiyasi bo‘lib o‘tmoqda. O‘zbekiston Prezidenti huzuridagi Strategik va mintaqalararo tadqiqotlar instituti bilan hamkorlikda tashkil etilgan ushbu tadbir «Valday» klubi O‘zbekistonda o‘tkazayotgan ikkinchi konferensiya bo‘lib, 2019 yil noyabrida Samarqandda klubning Markaziy Osiyo konferensiyasi bo‘lib o‘tgandi.

Bir kunga mo‘ljallangan konferensiyada ikki mamlakatdan 30 nafarga yaqin ekspert ishtirok etmoqda. Tomonlar Rossiya va O‘zbekiston o‘rtasidagi ikki tomonlama munosabatlar, mintaqaviy hamkorlik va o‘zaro bog‘liqlik hamda Afg‘onistondagi vaziyat borasida fikr almashishni rejalashtirgan.

Eslatib o‘tamiz, 23 iyul kuni Markaziy saylov komissiyasi tomonidan O‘zbekistonda prezidentlik saylovlariga rasman start berilgandi.

Saylov joriy yil 24 oktabr kuni bo‘lib o‘tadi. Prezidentlik uchun kurash Alisher Qodirov (Milliy tiklanish partiyasidan), Narzullo Oblomurodov (Ekologik partiyadan), Maqsuda Vorisova (O‘zbekiston Xalq demokratik partiyasidan), Bahrom Abduxalimov (“Adolat” partiyasidan) va amaldagi davlat rahbari Shavkat Mirziyoyev (O‘zLiDeP partiyasidan) o‘rtasida kechadi. Bugundan prezidentlikka nomzodlarning saylovoldi tashviqoti boshlandi.